Gula 233
Si sister Veronica makapila motawag sa buhatan sa kapolisan sulod sa usa ka adlaw aron pagpakisayod kun may development na ba mahitungod sa pagpangita kang Rey. Apan kabawo ang iyang naangkon. Wala’y maayong balita nga gikataho ang kapolisan kaniya gumikan kay wala man gayud nila makita si Rey. Si Capt. Sancho Benale mismo wala’y ideya kun hain mopaingon ang iyang sinaligang polis.
Inanay nang gibalikan sa kabaskog si Rey. Kusog ang alibyo sa pagkaalim sa iyang samad. Midaot siya’g diyotay. Apan wala na siya magluspad. Mibalik na usab ang gana sa iyang pagkaon. Natangtangan na sa mga bendahe ang iyang mga samad.
Usa niana ka hapon, sa pagpauli ni Corporal David Benturada gikan sa presinto sa kapolisan, maoy iyang naabtan si Rey nga nag-ilis og sapot. Milingi kini kaniya pagkamatikod nga misulod siya sa hawanan sa sala.
“Sir,” ni Corporal Benturada pa, “u-unsay buot ipasabot niining akong nakita?”
“Mobiya na ko dinhi, Benturada,” mubong tubag ni Rey. “U-unsa?” Nakatuaw si Benturada. “A-apan asa ka man paingon, Sir?”
“Moadto ako sa dapit diin makabaton ako’g kalinaw sa hunahuna.”
Nahatutok si Benturada kang Rey. Apan wala’y mga pulong nanglugwa sa mga ngabil sa Korporal. -- Sumpayan pa