Mibalik si Alicia mangtas

Daw usa ka dakong sunog nga mikaylap ang balita nga si Alicia gilugos. Luoy kaayo kini kay mao na lay nakita ang hubo niining lawas diha sa tugkaran sa ilang balay nga daghan kaayong pinasoan sa sigarilyo ug duna pay daghang samad-samad ang tibuok niyang kalawasan nga nagpasabot nga ang naghimo sa maong krimen mga drug addict.

Kaingon nila’g patay na si Alicia kay wala na man kini maglihok dihang gidala kini sa tambalanan. Unsaon nga siya ra gong usa ang nagpuyo sa ilang balay. Patay na ang iyang tatay Isko ug patay na pud ang iyang nanay Gunda. Bugtong siyang anak. Ug kun ang kaanyag maoy hisgotan si Alicia may katahom nga makapanglad-ok gyud sa iyang laway kutob sa lalaki nga makatutok sa iyang bigot ug bus-ok nga lawas. Dunay nangulitawo kang Alicia ug kini mao si Mancio apan wala pa gyud sugta ni Alicia. Ug tungod sa nahitabo sa dalaga nga gipanamastamasan nga matawag nga usa ka “Gang Rape” mihilak si Mancio. Ug siya man gani ang miabaga sa galastohan sa Hospital diin si Alicia luya pa ug dili na makasulti. Paglabay sa tulo ka bulan medyo hinayhinay nga mibalik kang Alicia ang kalagsik sa iyang lawas. Unya kalit lang nahanaw si Alicia nga way nahibawo kun asa kini mopaingon. Bisan si Mancio wala sab masayod sa kalit nga pagkahanaw sa dalaga. Tingali sa kauwaw sa iyang nahiagoman maong mipalayo kini sa ilang balangay.

“Mahal ko si Alicia, Berto,” ni Mancio pa ngadtong Berto nga higala niya. “Apan ang gisakitan ko lang kay wala gyud siya magpahibawo nako kun asa na siya karon?”

“Tungod tingali sa nahitabo niya, Bay Mancio, naa pa ang truma sa iyang pagka-babaye. Tiaw moy, gitabangan og lugos. Unya, wala pa gyud hibaw-i kinsa ang mga lampingasan ang naglugos ni Alicia, bay Mancio?” ni Berto pa nga gibati’g kasubo sa nahitabo ni Alicia ug gibati’g kalagot sa mga drug addicts nga milugos sa dalaga.

Unya, kalit lang nagubot ang tibuok balangay dihang napalgan ang unom ka patay’ng lawas nilang Maximo ug mga barkada. Mora’g gipangkuniskunis ang ilang  kalawasan ug wala na gani sulod ang ilang mga lawas, wala nay tinai, atay ug batikolon. Kini si Maximo nadungog nga drug addict ug siya ang leader sa ilang grupo kay lagi mga anak man sila’g mga dato dinhi sa ilang baryo. Unya kalit lang may gitaho si Berto ngadtong Mancio. Niini pa, “Bay, bay Mancio, si, si Alicia, naa na, nahibalik na siya ug misamot siya kaguwapa  karon sa akong tan-aw ug iya kong gipangutana bahin nimo.”

Tungod niini, kalit lang mikatol ang mga tiil ni Mancio aron adtoon si Alicia didto sa ilang balay. Pag-abot niya sa balay ni Alicia maoy nakita ni Mancio ang laksot nga nawong sa dalaga nga tag-as na kaayo’g mga bangkil ug nanglikaang ang mga buhok. (Kataposan)