Lihok sa kinaiyahan

Usa ka Real Estate Broker si Cosme. Maong tagdugay mauli sa ilang balay. Ug maglabi ang panahon gawas sa iyang opisina. Daghan siya’g higayong makapanguyab nga way kalibutan ang asawa. May ka-date siya karong hapona. Mag-abot sila sa Park Mall sa alas sayis sa hapon. Alas singko y media pa lang, nag-estambay na siya sa lobby nga ilang gisabutan. Unya nakit-an niya si Daisy iyang kinamaguwangang anak babaye. May kuyog lalaki. Nag-agbay sa dalaga. Nalimtan ni Cosme ang iyang ka-date sa dakong kahikurat niya. Hilom niyang gisundan sila.

Wa siya magdahum nga may uyab na ang iyang anak. Wa man gyu’y namisita nga lalaki sa ila. Nakahuman na hinoon og kurso si Daisy. Nagtrabaho na. Puwede na magminyo kun gusto.

Unya, nipara og taksi ang lalaki. Nanakay silang duha.

“Mo-tsek-in og motel!” sa hunahuna ni Cosme. Naniga iyang mga mata. Nidagan siya ngadto sa atubangan sa taksi. Gibabagan niya.

“Bay! Pakanauga nang babaye. Ako nang anak!” ni Cosme ngadto sa drayber sa taksi.

Nilingi ang drayber sa iyang luyo. “Imo nang papa, Day?” sa drayber. “O. Ako nang papa. Apan husto na ko’s edad. Di na siya kapanghilabot sa akong hukom,” ni Daisy. Nangluspad sila.

“Pakanauga lang kadiyot. Kay makig-istorya ko” ni Cosme.

Nanaug si Daisy. Nag-waiting na lang ang taksi. Kay natumba na ang metro.

“Unsa man ning imong gibuhat? Mo-tsek-in mo?’ ni Cosme. Nagbutokbutok ang dughan sa kalagot.

“Uyab nako ni ang akong kuyog. Wa nako pabisitaha’s ato kay masuko man ka. Over protective ka man nako tungod sa imong kahimabaye!” ni Daisy. Daw natuk-an si Cosme.

“Pasagdi lang ko, Pa. Kay husto na ko’s edad” ni Daisy.

“Gani, kadaghan na mi ni-tsek-in ni Mike. Naghigugmaay mi. Ug nagplano na mi’s among kasal” dugang niya.

“Wa ka man namo tudloi ining butanga. Nganong nakat-on man ka?” ni Cosme. Way laing masulti.

“Lihok sa kinaiyahan. Ang liso nga nalubong sa yuta, gitudloan ba nimo sa paggitib?” ni Daisy.

Nisamot ang kakurat ni Cosme. Kalaglum ba sa mga pulong sa iyang anak! Nibiya na lang siya.