Bugti sa kapakyasan Gula-3

“Wala ka pa diay matulog Lan? Nabag-ohan ka tingali sa lugar no?” pasiuna ni Nestor ngadto sa bag-o niya’ng katabang.

Mipahiyom si Lanie. Iyang gipasabot si Nestor nga natag-anan niya nga nabag-ohan pa siya sa lugar nga iyang nahimutangan mao nga wala dayon siya makatulog.

“Ingon ana g’yud na sagad ang bation nimo basta bag-o ka sa lugar. Mas maayo hinuon kay magkalingaw usa ta og sultihanay,” matud ni Nestor.

Nagpakisayod si Nestor kang Lanie kun tuyo ba gayud sa dalaga nga manarbaho dinhi sa dakbayan. Wala motug-an si Lanie ngadto sa iyang agawon sa tinuod nga rason nga ang pagbiya niya sa ilang dapit sa probinsya nagumikan sa kapakyasan niya sa gugma.

“Nalipay ko nga nakauban ka na namo dinhi Lan, kay mingaw kaayo kun kami ra dinhi ug sa akong tiguwang na nga kusinera. Tungod sa lagyo nga gintang sa among pangedaron dili kaayo kami suod g’yud,” ni Nestor pa.

Nasayran ni Lanie nga 40 anyos pa lang diay si Nestor ug nabiyudo kini mga dul-an na sa usa ka tuig. Sagad naminaw lang si Lanie sa mga pagsugid ni Nestor sa iyang kaagi. Gisaysay ni Nestor ang kahaw-ang nga iyang gibati dihang wala na ang iyang asawa.

Takulahaw lang nga naagni si Lanie sa pagsugilon usab sa tinuod nga rason ngano nga mianhi siya sa dakbayan ug gibiyaan ang dapit nila sa probinsya. Nakapanglingo-lingo si Nestor nga namati sa mga gisugilon kaniya ni Lanie.

Gibati og kalooy si Nestor ngadto kang Lanie. “Pasagdi lang Lan, ayaw supaka ang kabubot-on sa atong Labaw’ng makagagahom. Tingali adunay giandam ang Ginoo para kanimo. Ako bitaw, pagkamatay sa akong misis, daw midat-og kanako ang kalibutan apan gisabot nako nga iyang pagbuot ang tanan. Dili ba ang pangadyeon nagkanayon man nga matuman ang imong pagbuot dinhi sa yuta ug maingon man sa langit?” giingnan niya si Lanie.

Nakapahiyom si Lanie kay tukma ang gisulti ni Nestor. Nakayango-yango siya ug nakapahiyom. Taud-taud, nananghid na si Lanie nga matulog na. (Sumpayan)