Bugti sa kapakyasan

Gibiyaan ni Lanie ang ilang dapit sa Medellin, usa ka lungsod nga nahimutang dapit sa tumoy nga bahin sa amihanang Sugbo. Milangyaw si Lanie dinhi sa dakbayan aron paghikalimot sa kapakyasan niya sa gugma.

Ang mga ginikanan ni Lanie maoy mitambag kaniya nga mobakasyon sa iyang iyaan nga may tindahan diha sa Taboan public market. Kaslonon na ang boyfriend ni Lanie ngadto sa laing babaye kay naabtan kini sa amahan nga nagparayganay ug ang iyang anak sulod mismo sa kuwarto sa ilang balay.

Nalooy ang mga ginikanan ni Lanie nga ang dalaga kanunay lang maghilak tungod sa iyang kapakyasan sa gugma. Ang wala mahibaw-i sa mga ginikanan ni Lanie nga natugyan na niya  ang iyang pagka babaye kang Ramon.

Giubanan si Lanie sa iyang inahan diha nga gihatod kini sa balay sa iyang igsuon diha sa Mabolo. Sayo nga miabot ang bus nga ilang gisakyan mao nga wala pa makalakaw ang iyaan ni Lanie paingon sa merkado aron maninda.

“Ako usa kini nga pabakasyonon si Lanie dinhi sa inyo Minda kay aron malingaw ni. Ay ada, na broken hearted tawon ni kay na-korner man ang iyang boyfriend ug napugos pagpakasal sa laing babaye,” giingnan sa inahan ni Lanie ang iyang igsuon.

Usahay si Lanie mouban sa iyang tiya sa tindahan niini sa Taboan. Usahay magpabilin ra ‘sab siya sa balay. “Duna ko’y amigo nga tag-iya’g tindahan Lanie nga nangita og katabang sa ilang balay, byudo ni siya apan buotan kaayo, relihiyoso, basin og ganahan ka nga manarbaho?” matud sa iyaan ni Lanie.

Nakumbinsir si Lanie nga manarbaho apan gusto niya nga makita usa ang balay nga iyang trabahoan ug ang mahimo unya niya nga agawon. Tuod, pagka ugma sa buntag, gidala si Lanie sa iyang iyaan sa balay ni Nestor sa Barangay Tejero.

“Kana’ng balaya Lanie, tupad sa tunghaan mao kana ang balay ni Nestor nga akong patrabahoan nimo,” matud ni tiya niya Lucing. Igo-igo g’yud ang gidak-on sa balay. Gipindot ni Lucing ang doorbell ug taud-taud may miabli sa pultahan. (Sumpayan)