Daug nga mora’g pildi

Unsa man ning hitaboa, attorney? Nga daug man kos kaso, mora ma’g pildi?” sukot ni Mr. Yul Daniro ngadto’s iyang abogado nga si Atty. Jessie Manicab. Luta ang kalibog sa hitsura sa kliyente. Nangunot ang agtang.

Nagping-it ug nagpamente. Naghinabi sila ning sayong kahaponon sulod sa IBP Canteen human makadawat si Yul sa kopya sa hukom sa Labor Arbiter, mahitungod sa iyang kaso. Igo lang silang nakalingkod, wa pa niorder og makaon, nipadayag dayon si Yul sa iyang kadismaya. Gipaminaw pag-ayo ni Jessie ang reklamo ni Yul.

Gikiha si Yul sa upat ka tawo nga daw sinuholan niya. Duna siya’y yuta nga bungtod ug bakilid. Iyang gipapatag. Paghuma’g patag, nawad-an na’g trabaho ang upat nga mga truck boy lang sa mga truck nga naghakot sa mga anapog o filling materials. Niingon ang Labor Arbiter sa iyang hukom, nga wala makapamatuod ang upat nga empleyado sila ni Yul. Apan “for humanitarian reason’ gipabayad si Yulog “financial assistance” ngadto sa upat sa tag-diyes mil pesos kada usa.

“Apelahan lang nato ngadto sa NLRC, ang hukom sa Labor Arbiter. Matawag man nag void decision o nulu o inbalido nga hukom. Walay hurisdiksiyon o otoridad ang Labor Arbiter nga mopabayad og kuwarta sa tawo nga dili empleyado. Ang dunay hurisdiksiyon ining puntoha ang Regional Trial Court. Dili Labor Arbiter. Sipyat ang Labor Arbiter niini” ni Jessie sa malumong mga pulong. “Nahala attorney. Gisalig ko lang nimo ang tanan” ni Yul, nakapanghupaw. Daw naluagluag iyang dughan.

Nitindog si Yul. Niduol sa mga displing makaon aron makapili og ilang matimo. (Kataposan)