Misulod si Andro sa usa ka grocery sa dalan Colon. Namalihug man gud ang iyang inahan nga siya na lang ang mangompra sa ilang kinahanglanon sa balay kay gikapoyan na kini paglakaw.
Diha’ng migawas si Andro sa iyang opisina, diritso siya nga misulod sa grocery ug girumbo dayon niya ang dapit nga tua gi-display ang mga biscuit. Mingaw ang tindahan sanglit adlaw kadto nga Biyernes ug layo pa ang sweldo.
Napasiga ang mga mata ni Andro diha nga nakita niya sa sawog ang usa ka pitaka sa babaye. Dali kini nga gipunit ni Andro ug gilibot niya sa pikas kay basin og diha pa ang tag-iya sa pitaka … apan wala siya’y tawo nga nakita.
Naglibog siya kun unsay himuon niya sa pitaka. Nahuna-huna ni Andro nga kun iya kini nga itugyan sa management sa tindahan basin og dili mahibalik sa tag-iya ang pitaka. Miadto si Andro sa daplin ug gibuksan ang pitaka.
Maoy misugat sa iyang panan-aw ang hulagway sa usa ka babaye. Matahom nga hulagway nga nagpahiyom maoy misugat sa iyang panan-aw. Gikulbaan si Andro nga nagtan-aw sa hulagway sa babaye.
Giukab ni Andro ang pitaka ug nakita niya nga daghang kuwarta ang sulod sa pitaka. Duna gani linibo ug tibuok P500 nga papel de bangko. Natibuok sa huna-huna ni Andro nga kuwartahan ang tag-iya sa pitaka.
Gisud-ong pag-ayo ni Andro ang hulagway ug wala na siya modayon pagpangompra. Gilibot niya ang tibuok grocery aron pagpangita sa babaye, apan wala gayud niya igkita. Gipangutana ni Andro ang nag-uniporme nga babaye nga gituohan niya nga supervisor sa tindahan kun aduna ba sila’y public address system.
Gitug-anan niya ang babaye nga may nakit-an siya nga pitaka apan wala niya itug-an kun pila ang sulod niini. Gipakita niya sa supervisor ang iyang identification card. “Mao kini ang akong ngalan ma’am. Kun may mangita makontak ko pinaagi sa akong mobile phone,†matud ni Andro.
Sanglit guba ang public address system sa tindahan, wala sila maka-anunsyo kun kinsa ang nawad-an og pitaka. Misaka si Andro sa second floor ug giabtik niya ang iyang mga mata pag-aninaw sa babaye base sa hulagway. (Sumpayan)