Isla Paraiso

Mialipadsay si Rey. Nahapasok siya sa steel cabinet. Mingislo ang iyang nawong sa kasakit. Mora siya’g nalipong.

Miduol si Col. Villadar kaniya ug gigunitan niini ang kuwelyo sa diyaket nga iyang gisul-ob. Unya gibitad siya niini ug gidasok ngadto sa gipatongpatong nga mga kahon nga gisudlan sa mga basiyong botelya sa serbesa. Natumpag ang kamada sa mga kahon sa botelya paghidasmag sa lawas ni Rey. Nadat-ogan si Rey sa mga kahon. Nag-agumod si Rey sa kasakit.

Gipangwakli ni Col. Villadar ang mga kahon sa serbesa nga nagtabon kang Rey. Gibulanit niya ang batan-ong polis. Nagkayo ang iyang mga mata ug nanggahi ang iyang apapangig sa tumang kalagot.

Gibaswat niya si Rey. Nahisama si Rey sa usa ka sako nga gitugpo sa koronel dayon giitsa siya ngadto sa ibabaw sa steel cabinet. Mihagsa ang lawas ni Rey sa ibabaw sa  steel cabinet, miligid ug dayon mihagsa ngadto sa salog. Nabulit na sa dugo ang nawong ug lawas ni Rey. “Unsa? Mosukol ka pa?” Nagpaminti ang koronel nga mibulanit na usab kang Rey.

Unya gibanduwa na usab si Rey sa koronel ngadto sa nagpasad nga mga kahon sa serbesa.

Ang koronel nakasigpat sa .45 kalibre ug Uzi ni Rey nga naghigda sa salog nga semento human kini buhii ni Rey kaganina. -- Sumpayan pa