Unos sa kapalaran

Gula 6

Gikulbaan kaayo si Maribel nga nakadungog sa balita sa radyo. Bana-bana niya tukma ra ba g’yud nga nagpaingon na sa ilang dapit sila si Ernest ug ang iyang mga ginikanan gikan sa pantalan sa Davao.

Naminaw siya pagpadayon sa radio. Taud-taud, ang announcer midawat og report gikan sa iyang news reporter nga gipaadto sa dapit nahitaboan. Gi-interview niini ang mga samaron kay ang mga patay wala dayon mailhi.

Daw midat-og ni Maribel ang kalibotan diha nga gipaila sa radio reporter ang iyang gi-interview nga mao si Ernest. Nasayran ni Maribel nga naapil g’yud diay ang mga ginikanan ni Ernest sa mao nga aksidente.

Midali sa pag-adto si Maribel sa dapit nahitaboan. Nahuwasan siya sa grabe’ng kakuyaw kay nakaangkon lang og mga samad ang amahan ug inahan ni Ernest. Bisan si Ernest dili kaayo dako ang kadaot nga iyang nahiagoman.

Misakay sila og laing sakyanan ug nagpahatod sa panimalay nila ni Maribel. Nagpunay og tutok si Maribel sa inahan ni Ernest kay naluoy siya sa kahimtang niini nga may samad diha sa iyang bukton.

Ang amahan ni Ernest sa ulo ang iyang samad apan miingon nga igo ra kini nga naparok sa barandilya sa sakyanan. Dili maglagyo ang pangedaron sa mga ginikanan ni Ernest ug sa mga ginikanan ni Maribel. Bisan bag-o pa sila nga nagkita, apan nasabot ni Maribel nga mga buotan sila nga pagkatawo.

“Ikaw diay si Maribel day nga umaabot namo nga umagad,” matud sa inahan ni Ernest nga mihapuhap sa buko-buko ni Maribel. Mihunong ang ilang gisakyan atubangan gayud sa panimalay nila ni Maribel.

Giabagan ni Maribel ug Ernest ang mga ginikanan sa ulitawo sa ilang pagkanaog sa sakyanan.

Misugat kanila ang mga ginikanan ni Maribel nga kaganina ra usab nagpaabot ug nabalaka usab pagkasayod nga nadisgrasya ang gisakyan sa umaabot nila nga kumpare ug kumare.

Nanulod sila sa panimalay ug gipalingkod ang mga ginikanan ni Ernest. Walay tingog nga migawas gikan sa inahan ni Maribel nga kaganina ra gatan-aw sa inahan ni Ernest. Taud-taud. “Manang Cleofe, ikaw ba kini?” matud sa inahan ni Maribel. (Sumpayan)