Unos sa kapalaran

Gula 3

Tungod sa kamapinanggaon ni Ernest kang Maribel, nabihag sa hingpit sa ulitawo ang kinatibuk-ang pagbati sa dalaga. Atol sa birthday ni Maribel, wala siya motrabaho sa gialagaran niya nga department store. Nanuroy sila si Ernest.

Feel kaayo ni Maribel nga nakig-uban sa iyang buotan nga boyfriend atol sa iyang adlaw’ng natawhan tungod kay gipananghid man g’yud ni Ernest sa iyang mga ginikanan nga sila manuroy. Pangaligo sa dagat ang pananghid ni Ernest mao nga nagdala og ilisan si Maribel nga gisulod niya sa bag.

Nahibulong si Maribel kay nagdala og sakyanan si Ernest. Iyang nasayran nga hinuwaman diay kini ni Ernest sa ilang kompaniya. Gidala ni Ernest si Maribel didto sa Paradise Island Park and Beach Resort tungod sa kanindot sa mao nga dapit.

Wala mosipyat si Ernest kay nakadayeg kaayo si Maribel sa mao nga lugar. Mikuha sila og cottage ug didto nila gipahimutang ang ilang mga dala. “Dinhi kami mag-Christmas party ang mga kawani sa among kompaniya nga dia magbase sa Mindanao mao nga nadiskobre nako ang kaanindot niining mao nga dapit,” pasabot ni Ernest sa iyang girlfriend.

Nangaligo sila si Maribel ug Ernest sa tin-aw kaayo nga dagat. Walay kukauwaw sila’ng duha tungod kay walay nakaila kanila didto sa mao nga lugar. “Salamat Ern ha, enjoy kaayo ko sa akong birthday karong tuiga and I hope nga dili kini kataposan sa akong nindot nga birthday. Tinuod g’yud nga paradise kini’ng lugara,” matud ni Maribel nga nagpahiyom. Diha’ng gigutom na sila, gikuha ni Ernest ang gidala niya’ng pagkaon gikan sa baggage compartment sa sakyanan. “Wow, naghilom-hilom ka ra man diay Ern. Daghan ka man diay og gidala nga pagkaon,” ni Maribel nga wala makatuo nga gipangandaman g’yud diay ni Ernest ang ilang pagpangaligo.

“Surpresa nako kini sa babaye nga akong gimahal,” matud ni Ernest. Gidala nila ang mga pagkaon sa cottage ug didto sila nangaon sa kayda. Human sa ilang pagpangaon, giagda ni Ernest si Maribel nga mopahuway una sa sulod sa cottage.

“Pahuway usa Mar didto sa sulod, ari lang ko sa gawas,” giingnan ni Ernest ang iyang girlfriend. “Pahuway lang ‘sab gud diri sa sulod, mauwaw ka pa nga sweetheart ka man nako?” ni Maribel. (Sumpayan)