Unos sa kapalaran

Ingon sa usa ka masipa’ng liti sa udto’ng tutok alang kang Maribel ang kasayuran nga iyang nasayran mahitungod sa pagkatawo sa iyang boyfriend nga si Ernest. Tibuok kasing-kasing nga gimahal ni Maribel si Ernest kay gani wala siya mag-ukon-ukon pagtugyan sa iyang pagka-babaye atol sa birthday sa iyang boyfriend.

Usa ka salesman sa dakong kompaniya sa mga toothpaste si Ernest ug taud-taud na nga nadistino sa Mindanao. Didto sila nagkaila si Maribel sa gitrabahoan niini nga department store.

Kahera si Maribel sa department store sa Davao nga maoy usa sa mga outlets nga hatdan ni Ernest sa iyang mga produkto. Nagkasuod sila si Ernest ug Maribel.

Sa pagpanglabay sa mga adlaw ug buwan, ang ilang panagsuod anam-anam nga nanalingsing og mga pagbati sa usa’g-usa. Nasurpresa si Maribel kay nakadawat siya’g gift gikan ni Ernest.

Wala niya palandonga nga nasayran ni Ernest ang iyang birthday ug gipadad-an siya’g makapalipay kaayo nga gift – mahalon kaayo nga selpon ug may pakapin nga birthday cake.

Kadto maoy nagsilbi nga yawe sa kasing-kasing ni Maribel nga mahimo’ng suod kaayo niya si Ernest. Dunay mga adlaw nga dugay’ng makabalik si Ernest sa gitrabahoan nga department store ni Maribel, bation na niya ang kahaw-ang ug kamingaw sa ulitawo.

Mga kapin sa buwan nga wala na makabalik si Ernest sa tindahan. Usa ka buntag, layo kaayo og panglantaw si Maribel kay mingaw ug wala’y kustomer ang tindahan.

Takulahaw lang nga miabot si Ernest. “Kumusta Mar,” matud ni Ernest nga nagpahiyom. Daw nagyapa-yapa sa kalipay ang dughan ni Maribel nga nakakita sa ulitawo. “Sori kaayo, emergency man gud sa amo sa Cebu mao nga wala na ko makapananghid nimo. Wala usab ko makapangayo sa imong contact numbers,” pasabot ni Ernest.

Kusog kaayo ang pagkulba sa dughan ni Maribel. Wala siya makasabot sa iyang gibati. “Imbitahon ka unta nako unya’ng gabii og dinner kun pwede ra nimo,” matud ni Ernest.

Wala g’yud magmakuli si Maribel sa pagtangdo. Sa ilang panag-uban pagka gabii, didto na nga gidaygan ni Ernest si Maribel sa iyang gugma. (Sumpayan)