May ‘right of way’ ang mga huwes

Dunay dakong parking space luyo sa Palace of Justice sa dakbayan nga bag-ong giablihan. Sukad naabli ang maong parkingan, anha na gyud tigparkingan diha si Atty. Charlie Condeno kun dunay tambungang bista. Niya pa, hamugaway ang maong parking space.

Apan apeke ang dalan padulong didto. Karon, alas nuybe pa lang sa buntag nigawas na siya sa parkingan. Unya may nasugatan siyang Pajero nga abuhon sa apeke nga dalan. Iya dayong gipakidlapan sa iyang headlight aron unta moatras ug paagion siya.

Wa niatras ang Pajero. Unya paglabay sa pipila ka gutling, gipitohan si Charlie sa sekyu nga maoy paatrason. Si Charlie na lang ang niatras. Duna diay espesyal nga parkingan ang maong Pajero. Unya nakapahiyom si Charlie kay nisenyas ang drayber sa Pajero. Senyas sa yanong drayber nga nangayo’g dispensa. Si Judge Freddie Cortes diay. (Di man dayon mailhan kay tinted man ang mga bintana ug windshield sa Pajero) nisenyas sab si Charlie nga nangayo’g dispensa.

“Of course, duna gyuy right of way ang mga huwes. The judge is the Court. Lawyers are only officers of the Court. Under gyud sa huwes ang mga abogado” tuaw niya sa hilom.

Dili unta ni mahitabo kun wa pa si Charlie nasipyat sa schedule sa bista sa iyang kaso. Abi niya’g buntag iyang bista karong adlawa. Hapon pa diay.

Mao pay iyang pagkaamgo pagkabasa niya sa kalendaryo sa husgado (dili sa husgado ni Judge Cortes). Nagsalig si Charlie sa iyang sharp memory. Wa mitan-aw sa iyang talaadlawan.

Ug ang hitabo nakapahinumdum niya sa usa ka Chinese proverb nga nag-ingon “The faintest ink is better than the sharpest memory’ maong nasipyat siya nga wa mitan-aw sa iyang talaadlawan. (Kataposan)