Bar girl - Gula 3

Nakadayeg sa hilom si Delfin kang Leny tungod kay midiga g’yud kini sa iyang baraha pinaagi sa walay kukauwaw nga miangkon nga usa siya ka dancer.

Gilibre na usab si Leny og puto-maya ni Delfin. Diha’ng motabok na unta sa karsada si Leny paingon sa gipuy-an niya nga boarding house, giubanan kini ni Delfin. Gipahunong niya ang nagsingabot nga taksi aron luwas sila nga makalabang sa karsada.

“Suroy unya sa bar Delfin,” giingnan ni Leny ang bag-o niya nga nahigala. “Unya, pwede tika huwaton inig-off nimo aron ihatud tika pagpauli?” gisukna ni Delfin ang amiga niya nga bar dancer. Daw dili g’yud siya makatuo nga nagtrabaho sa bar si Leny kay dili man siya kiaton nga pagka babaye.

Pagsulod na ni Leny sa giabtan niya nga boarding house, mibalik si Delfin sa atbang nga karsada ug gibayaran niya ang puto-maya nga iyang nakaon ug kadtong gikuha ni Leny. “Bai, kun mokuha gani si Leny nimo og puto-maya, ako ray bayad ha? Pundohan tika og kwarta,” matud ni Delfin.

Nakapahiyom ang tindero’g puto-maya nga mitutok ni Delfin. “Mora’g nagdako g’yud na’ng inyong panagsuod sir da. Swerte kaayo ka kay pwerte’ng guwapaha ana’ng Leny,” matud sa car washer nga si Temyo nga nagpaminaw ra samtang naghugas sa motor.

Mibawos og pahiyom si Delfin ug gitug-anan ang tindero’g puto-maya nga moadto siya sa bar nga gitrabahoan ni Leny inigka-gabii. “Aw wala na, makagakus-gakos ka na g’yud diay niya unya,” matud sa car washer.

“Giingnan ko niya  kaniadto nga dili siya magpagakus-gakos sama sa gihimo sa iyang mga kauban. Maayo hinuon para mahibaw-an nato og tinuod ba,” dugang sa tindero’g puto-maya. Samtang sila nagsultihanay, wala magpalibak si Leny kay mibalik kini pagtabok sa karsada.

Nangahilom sila. “Naa pa’y puto-maya? Gipangayoan ko sa akong kauban sa room nga si Nympha,” matud ni Leny. Pwerte nga nakatutok ni Delfin kay nag-short pants na si Leny niini’ng iyang pagbalik.

Takulahaw lang nga mitubod ang laway ni Delfin nga nagsud-ong sa paa sa bar dancer. Nasakpan siya ni Leny nga nagtutok sa iyang puti kaayo nga paa ug nakapahiyom ang dalaga. “Adto baya sa bar unya ha?” ni Leny pa. (Sumpayan)