Bar Girl
Giswerte si Delfin usa ka buntag niana. Nagpahugas si Delfin sa iyang motorsiklo sa usa ka pahugasan sa V. Rama Avenue diha nga adunay miabot nga tigbaligya og puto maya ug sikwati. Suki diay kini sa mga tighugas.
Komedyante ‘sab ang mao nga tigbaligya og puto-maya. Taud-taud, nalantawan ni Delfin nga adunay babaye nga mitabok gikan sa atbang nga bahin sa karsada. Nagsul-ob kini og pinakigol nga short pants.
“Naa ka pa’y puto-maya suki?†nagngisi ang babaye ngadto sa tigbaligya og puto-maya. Nasabtan ni Delfin nga kaila ug suki na diay kini sa tigbaligya og puto-maya ang mao nga babaye kay gisangpit na man siya og suki.
Mikuha kini og napulo ka putos nga puto-maya. Dayon mitunol kini og tibuok nga usa ka libo ka pesos. Miuntol ang naninda’g puto-maya kay wala pa makaabot ang iyang halin ug ikasukli sa babaye. Gitutokan ni Delfin ang babaye.
Matahom kini nga pagka dalaga. “Aron magamay-gamay na lang ang suklian miss, apila na lang og bayad ang amo’ng nakuha,†gikomedyahan ni Delfin ang babaye. Mitutok ang babaye ka’ng Delfin ug mipahiyom.
“Ah, ang babaye na hinuon ang imong pabangkahon? Kamaayo nimo no?†mingisi na g’yud ang babaye. Miapil na lang ‘sab pagngisi si Delfin. “Aw, sige ako na la’y bayad sa iyang napulo ka putos nga puto-maya bai, basta makig-ila-ila lang,†ni Delfin pa nga mitutok pag-ayo sa babaye.
“Kana ra diay? Sige, ako si Leny,†paila sa babaye. Nagpasalamat si Leny kang Delfin ug milabang kini sa karsada. “Suki diay kadto si Leny nimo bai?†gisukna ni Delfin ang tigbaligya og puto-maya. “Dugay na nako na siya nga suki sir. Naa man siya nagpuyo ana nga green nga balay,†gitudlo sa tigbaligya’g puto-maya ang balay nga may gate.
Nahuna-huna ni Delfin nga kuwartahan diay ang mao nga babaye. “Nagtrabaho man kana siya sa bar diha sa Sanciangko mao nga daghan kaayo’g kuwarta,†matud sa tigbaligya’g puto-maya. Naiknat ang kilay ni Delfin nga nakadungog.
“Buot mo’ng ipasabot nga dancer o GRO si Leny?†gisukna niya ang iyang kaestorya. “Ambot, basta mao may iyang gitug-an sa una nga nagkasultihanay mi,†matud sa tindero’g puto-maya. (Sumpayan)
- Latest
