Kahidlaw sa babaye - Gula 7

Pagka gabii, giagi g’yud tuod ni Herbert si Charina aron magkuyog sila paingon sa disco. Nakaandam na diay’ng daan si Charina mao nga nanglakaw dayon sila. Nag-una si Charina paglakaw subay niadto’ng gamay nga agianan ug nagsunod kaniya si Herbert.

Gikan sa ilang nahimutangan, madungog na nila ang tukar sa diskohan. Nag-ikid-ikid pa si Charina samtang naglakaw. “Buyagan ka gani sa mga dili ingon nato Char nga nagsayaw-sayaw ka nga naglakaw,” komedya ni Herbert.

Igo lang mingisi si Charina nga nakadungog. Apan kalit lang napawo’ng ang kuryente ug mihari ang grabe’ng kangiob sa palibot. Nahadagan si Charina balik sa iyang agi ug napagakos kang Herbert tungod sa kahadlok.

Abtik usab kaayo si Herbert nga migakus sa dalaga. Nasimhot gayud ni Herbert ang kahumot sa perfume nga gigamit ni Charina. “Hala uy, nahadlok ko Bert kay bag-ohay pa ra ba nga may namatay diha sa unahan,” matud ni Charina.

“Wala’y problema Char, gakus lang gud nako,” matud ni Herbert. “Giganahan ‘sab ay nga nakagakus ko niya,” dala nga pangyamiid ni Charina apan pabilin siya nga migunit sa bukton sa batan-on nga ulitawo.

Mipadayon sila sa unahan. “Modayon lang ta Char kay basin og inig-abot nato didto mobalik na ang kuryente,” ni Herbert pa. Diha’ng nagkaduol sila niadto’ng balay nga namatyan, hapit na lang mikumpayot si Charina kang Herbert tungod sa kahadlok.

Daw wala na mahimutang si Herbert sa iyang gibati. Nakahinumdom siya nga dinhi’ng dapita niya gikuha kadto’ng panti sa babaye nga gitagoan pa niya sa iyang lawak. “Ayaw na lagi kahadlok Char kay dia bitaw ko, kiss ko nimo bi aron di ka na mahadlok,” ni Herbert pa dayong kiss kang Charina.

“Hala uy, manghawok ka man nga dili man ta uyab,” matud ni Charina. Mipahiyom si Herbert samtang padayong mikumpayot sa iyang bukton ang dalaga. “Di, mag-uyab na lang ta kay nakahawok na man ko nimo Char. Abi nimo, tinuod baya to’ng giingon ni Leo nga ibog kaayo ko nimo,” ni Herbert pa.

“Hmm binuang,” ni Charina. “Wala ko magbinuang uy, mahal ko kaayo ikaw Char,” matud ni Herbert dungan sa pagpatik og laing hawok sa aping sa dalaga. Pag-abot nila sa diskohan, ngitngit gihapon kaayo.

Nangita og kalingkoran sila si Herbert ug Charina. Misandig si Herbert sa punoan sa kahoy ug gipasandig niya si Charina sa iyang atubangan samtang gibalikisan niya kini sa iyang mga bukton. (Kataposan)