Pagka-ugma sa buntag, dagha’ng text messages nga diha sa selpon ni Sheena nga wala niya mabasa niana’ng miagi’ng gabii. Kadaghanan niini gikan sa iyang boyfriend nga si Elmer. Nangayo kini og pasaylo sa iya’ng nahimo nga naputong na usab tungod lang sa pagkalangan pag-abot ni Sheena sa oras nila nga gikasabotan . Apan bug-os na ang hukom ni Sheena nga palay-an na g’yud si Elmer. Pagka-udto, misuroy si Sheena sa usa ka mall sa Barangay Apas ug mipalit siya’g bag-o nga simpak. Giilisan niya ang iyang numero sa selpon aron dili na makontak pa ni Elmer.
Nagkalingaw na lang si Sheena sa pagsuroy-suroy sa mall dala ang pagpabugnaw tungod kay hilabihan kainit sa panahon. Gipul-an si Sheena sanglit gamay ra ang mall sa Barangay Apas mao nga misakay siya’g taksi ug miadto sa SM. Wala lang palandonga ni Sheena nga paspas kaayo ang pagkilab sa mga takna. Pagtan-aw niya sa iyang relo, hapit na ang alas singko sa hapon. Alas 5:30 sa hapon ang misa ni Fr. Jonas sa simbahan nga iya’ng gialagaran.
Gibana-bana ni Sheena nga dili pa siya mauwahi sa misa bisan og maglakaw lang siya paingon sa simbahan nga duol ra gikan sa SM. Tuod, wala pa magsugod ang misa paghiabot niya sa simbahan.
`Didto si Sheena nagpahimutang dapit gayud sa atubangan sa altar. Ang iyang nahimutangan bantang kaayo sa panan-aw sa pari. Mahinamon si Sheena nga nagpaabot ni Fr. Jonas.
Duna’y hamtong nga babaye nga katupad ni Sheena. “Si Fr. Jonas ba g’yud ang mo-misa kada ingon aron nga orasa?†gisukna ni Sheena ang katupad niya sa paglingkod.
Miyango ang hamtong babaye. “Mga upat ka buwan pa kana si Fr. Jonas nga dia dinhi madistino. Siya ang puli ni Padre Teban nga tua gibalhin sa Mandaue,†matud sa hamtong babaye. Nasabot ni Sheena nga tigsimbahan gayud ang iyang katupad.
Gusto lang siguroon ni Sheena kun si Fr. Jonas ba gayud ang mo-misa sama kagahapong adlawa. Tuod, mi-teleng-teleng na ang sakristan sa iyang tulo ka naglambigit nga bagtingan. Nagtimaan kini nga magsugod na ang misa.
Nalantawan na ni Sheena nga nagpaingon na sa altar si Fr. Jonas. Human kini makahawok ang pari sa altar, milantaw usab kini sa mga nanimba samtang padayon nga nag-awit ang choir sa simbahan.
Wala masayop si Sheena, nakit-an g’yud siya sa pari. Mipahiyom kini pagkakita kaniya diha sa atubangan. (Sumpayan)