Isla Paraiso

Sa nangaging engkuwentro nga nasugatan ni Rey wala siya’y kukahadlok nga miasdang sa mga kaaway. Apan ingon sa misamot ang iyang kaisog karon. Mora’g dili na siya mahadlok nga mamatay. Daw wala na siya mawili sa iyang kinabuhi karon nga naputol ang relasyon nila ni sister Veronica. Gikan sa iyang gipasalipdan, si Rey kalit kaayong mitindog. Unya kalit siyang mitungtong sa usa ka lamesa. Dihadiha, usa ka tulisan ang nakasigpat kaniya mipabuto gilayon sa armas niini. Si Rey nagdagan nga milatay sa naglumbay nga mga lamesa samtang giutasan og pusil sa tulisan. Pag-abot niya sa unahan, kalit siyang midayib paingon  ngadto sa nahimutangan sa daghang stell cabinet. Didto mipasalipod siya.

Apan sa dihang milunga na sa pagpabuto ang tulisan nga mipusil kaniya, kalit siyang migawas sa iyang gitagoan. Siya na usab ang mipabuto sa iyang Uzi. Maoy iyang gitumong ang tulisan nga mipusil kaniya dili pa lamang dugay. Naigo kini sa nagkalain-laing bahin sa lawas niini. Nahagba kini sa salog nga nalunang sa kaugalingong dugo. Wala nay kinabuhi. Ang armas niini nahasalibay.

Unya may mipusil kang Rey. Maayo gani kay nakadali siya pagpasalipod sa iyang kaugalingon. Napaak niya ang iyang wait samtang naghunahuna nga hapit siya maigo. Mibati siya’g tumang kalagot sa kaaway. Dili mahimong dili siya makabalos. -- Sumpayan pa