Isla Paraiso

Gula 178

“Nagtuo ko, Benturada, nga may naghilo sa hunahuna ni sister Veronica nga maoy nakapausab sa iyang desisyon.”

“Pastilan, Sir, kakalit ba niining hitaboa.” “Wa gyud ko magdahom nga mosangko sa ingon niini ang tanan.”

“Unya, Sir, unsa may gilaraw mong buhaton karon?”

“Wala na ako’y mahimo, Benturada, aron madugtong pagbalik ang among relasyon. Natugkad ko nga hugot na ang hukom ni sister Veronica nga dili na mohinayon pagluwat sa iyang bokasyon.”

“Basin diay’g mausab pa ang iyang hunahuna, Sir. May sanglitanan bitaw nga ang buang lang maoy dili maantigong mag-usab sa hunahuna.”

“Nakaila ako kang sister Veronica, Benturada. Suheto ako kaniya tungod kay kababata ko siya. Nasayod ko kun unsa siya kun maoy mopakanaog og desisyon. Nagtuo ako nga wala na gayo’y paglaum nga magkauli pa kami.”

“Ayaw pagpakawala sa paglaom, Sir. Hunahunaa lang nga usa siya ka madre. Apan kalit nausab ang iyang hunahuna nga maoy hinungdan nga gidawat niya ang imong gugma. Ug karon nausab  na usab ang iyang hunahuna. Kinsay nasayod nga ugma o sa sunod adlaw mabag-o na usab ang iyang desisyon.”

“Sa akong pagtuo, Benturada, lubog pa sa alkitran nga mahitabo kana.”

Kahilom. -- Sumpayan pa