Gula 5
Mora’g wala mahimutang si Kissamae, dugay siya nga nakatulog. Iyang gihuna-huna ang pagbisita ni Brando ugma Sabado, aron tudloan siya og guitar. Gihuna-huna daan ni Kissamae kun unsay iyang himuon kun mahitabo nga manguyab kaniya si Brando.
Gitimbang-timbang daan ni Kissamae kun may pagbati ba siya kang Brando. Wala pa kaayo masabti ni Kissamae ang iyang gibati kun nahigugma ba kaha siya ni Brando o midayeg lang siya niini tungod sa kaanindot niya motugtog gamit ang guitar ug maayo pa gayud mokanta.
Unya, takulahaw lang nga giganoy sa katulogon si Kissamae. Sayo nga mibangon si Kissamae pagkaugma tungod kay gipukaw siya ni Fe nga sayo kaayo nanawag. Gipahinumdoman si Kissamae sa higala nga mag-change shift sila, ug alas siete sa buntag ang ilang sulod.
Nagpasalamat si Kissamae kang Fe kay nakalimot g’yud siya nga adlaw na diay karon ang ilang duty. Nahuna-huna niya si Brando. Giteksan niya ang gitarista ug gipahibalo nga sugod karon lahi na ang iyang schedule sa trabaho. Taud-taud, mi-reply si Brando ug miingon nga lapas alas tres sa hapon na lang siya moadto sa gipuy-an sa dalaga.
Dali ra nga nakaandam si Kissamae sa iyang kaugalingon. Wala pa’y alas siete sa buntag didto na sila si Kissamae ug Fe sa call center. “Unsa day? Mobisita kanimo si Brando? Wala na, panguyaban ka na g’yud ana day,†daw dili makatuo si Fe sa gitug-an kaniya sa higala.
“Kun manguyab nimo si Brando day, unsa man imong sugton? Ingon ka man gud to nga maguwang ra nimo og edad,†dugang sukit-sukit ni Fe kang Kissamae. Wala motubag si Kissamae ug igo lang nga mipahiyom. Nanulod na sila kay alas siete na.
Pagka hapon, nanggawas na sila si Fe ug Kissamae gikan sa call center. Mihapit usa si Kissamae sa grocery sa JY kay aron duna sila’y makaon-kaon ug sa iyang bisita nga si Brando. “Naghuna-huna ka g’yud ni Brando day no? Nasayod na ko, may pagbati ka g’yud niya,†matud ni Fe.
Hapit na alas kuwatro sa hapon nga miabot si Kissamae sa balay. Naglakaw lang siya gikan sa call center kay duol ra man ang iyang gipuy-an. Diha’ng nagdanga-danga na si Kissamae sa iyang gipuy-an, nalantawan dayon niya si Brando nga nagbitbit og siyesta nga nagbarug-barog sa iyang boarding house.
Wala gayud kini mosipyat sa diskripsyon sa balay nga iyang gitug-an nga anaa siya magpuyo. Gisugat og pahiyom ni Brando ang dalaga. (Sumpayan)