Kissamae ug ang gitarista

Gula 2

Gitug-anan nila ni Kissamae ug Fe ang gitarista sa ilang mga ngalan. Dali ra kaayo sila nga nagkasuod tungod kay mahigalaon man usab ang gitarista nga si Brando. Nagbanus-banos sila si Fe ug Kissamae sa pag-request og ilang kinaham nga tukar. Naghuna-huna si Kissamae og mga lisud kaayo nga tukar nga daw mohilak ang sista nga gitikon sa gitarista sama sa When the Smoke is Going Down nga nahimo’ng popular kaniadto’ng dekada 80.

Apan yano ra kaayo kini nga gitugtog ni Brando. Daw mihilak g’yud tinuod ang tingog sa sista nga giayo’g gitik ni Brando ug didto nakadayeg kaayo si Kissamae sa abilidad sa bag-o niya’ng higala.

“Muondang ka na’g tukar?” matud ni Kissamae diha nga mihunong na og tukar si Brando ug gipanghipos na ang musical instrument sa mga kawani sa tindahan. “Gisamokan na tingali ang management kay pwerte’ng daghana na nga mga tawo nga nagpunsisok,” ni Brando pa. Nananghid sila si Kissamae ug Fe nga mobiya na kay mosuroy sila sa ubang mga dapit sa tindahan. “Puwede ba og makakuyog ninyo’ng duha? Wala na man ko’y lingaw kay human na man ang akong tahas,” matud ni Brando.

“Sige gud, dili ka man kaha magpakugos. Maayo hinuon nga adunay makabangka namo og pagkaon kun gutomon mi,” matud ni Fe nga may pagka komedyante ‘sab diay. “Wala’y problema,” dali kaayo nga nakatubag si Brando.

Nahurot-hurot na nila’g suroy ang tanang dapit sa tindahan apan wala g’yud sila’y gipalit. “Adto ta sa food court, basin og gigutom na mo,” matud ni Brando nga mitutok sa duha niya ka bag-ong higala.

 Si Brando g’yud tinuod ang mibangka kanila og pagkaon. Bisan og nahuman na sila pagkaon, wala dayon sila manindog, nagkalingaw sila’g sultihanay. Nakahukom ang duha ka call center agents nga mobalhin og laing department store nga suroyan.

Mibalibad si Brando nga dili makakuyog sa iyang mga amiga tungod kay mangandam pa siya sa lain niya nga tukar alas siete sa gabii sa usa ka hotel dinhi sa dakbayan.

Mitapon sila si Kissamae ug Fe sa higante’ng mall sa North Reclamation Area. “Tan-aw nako Kiss mora’g naka-like nimo si Brando kay maila kaayo sa pilit niya nga tinan-awan nimo,” matud sa komedyante nga si Fe.

“Dili ‘sab ko uy kay klaro man kaayo nga maguwang na man to siya nako og edad,” dali kaayo nga nakatubag si Kissamae. Nangatawa ang maghigala nga call center agents. “Midayeg lang hinuon ko niya sa kanindot niya mo-guitar,” ni Kissamae. (Sumpayan)