Isla Paraiso

Gula 165

“Si Padre Judas ang nagtabang kanako nga makasulod sa Orchids Sister’s Convent.” Nagkanayon si sister Veronica.

“Diin man kamo unang nagkaila nianang paria?” Nangutana si Rey.

“Didto sa Amerika. Niadtong usa pa ako ka nurse ug nanarbaho ako sa nasud sa mga tag-as og ilong.”

Miyangoyango si Rey.

Unya, kahilom.

Pagkilab sa pipila ka daklit, nangigham si Rey.

“Kanus-a ka man mobiya dinhi sa kumbento?” Gilaktod ni Rey ang pangutana nga kaganina pang nagaung-ong sa iyang hunahuna. “Gusto kong mahitabo kini sa labing madaling panahon, sister Veronica.”

Wala motubag si sister Veronica. Igo lang kining mitutok kang Rey.

“A-andam na ang tanan, sister Veronica,” matud na usab ni Rey. “Nananghid na ako sa among labaw nga mopauli ako sa Bohol ug misugot siya sa dihang gisultihan ko siya sa matuod nga hinungdan sa maong plano. Kun makahukom ka na kun kanus-a kita mamauli sa Bohol, mag-file gilayon ako og vacation leave.”

Ang pagpakahilom ni sister Veronica nakapaturok og kahibulong kang Rey. Sa miaging mga adlaw, sukad lang sila nagkatrato kanunay saya’g ang panagway niini nga makigsulti kanila. Apan lahi ang gipakita sa madre karon, kaganina pa niyang namatikdan nga nagmug-ot ang hitsura niini.-- Sumpayan pa