Tilaw-tilaw lang

Gula 5

Nagkasabot sila si Brady ug Nancy nga adto sila magkita kilid sa karaang building sa Compania Maritima inigka-ugma sa buntag, Domingo. Gituyo ni Nancy nga adto sila magkita kay malakaw ra kini gikan sa ilang dapit sa Sitio Bato, sakop sa Barangay Ermita.

Tuod, wala pa gani alas nueve sa buntag nga maoy gikasabotan nila ni Nancy didto na si Brady nagpaabot sa kilid sa karaan nga building. Gipalandongan ni Brady ang kotse ug nagkalingaw siya pagpaminaw og mga music.

Miabot na og mga tunga sa oras nga nagpaabot si Brady. Gipangulbaan siya nga basin og gibinuangan lang siya ni Nancy nga makigpanuroy apan dili diay niya tumanon. Nahuna-huna ni Brady nga kun may selpon pa ang dalagita iya na kini nga gitawag.

Nagkalingaw na lang g’yud pagpaminaw og music si Brady. Nindot usab kaayo ang mga gipatugtog nga awit sa FM station nga gipaminaw ni Brady. Wala damha ni Brady nga giganoy siya sa katulogon samtang nag-irag sa iyang sandiganan.

Nakurat na lang si Brady diha’ng adunay mihikap sa iyang nawong gikan sa gawas nga bahin sa sakyanan. Wala dayon siya’y nakita nga tawo, apan dihang mibangon si Brady, nakita niya si Nancy nga nagpahipi kilid sa awto.

“Sori ha nadugay ko kay milakaw pa man gud si Mama wala ko makapananghid dayon. Dili lang ta magdugay kaayo ha?” matud sa dalagita nga nagbarog diha sa iyang tungod. “Dali na Nanz,” iyang gisinyasan si Nancy nga motuyok na sa sakyanan aron makasakay sa passengers seat.

Gipaandar ni Brady ang sakyanan. “Asa man ta?” pangutana ni Nancy dihang misugod na ang kotse pag-aginod subay sa karsada nga milagbas sa South Road Properties. “Birthday sa akong amigo sa Aloguinsan, mangadto ta. Malingaw ka didto kay adunay kalasangan nga wala sa siyudad,” ni Brady pa.

“Layo ba dinhi ang Aloguinsan?” matud ni Nancy. Gipasabot siya ni Brady nga udto na g’yud sila nga mahiabot kay bukid nga bahin ang dapit sa iyang amigo. Karon pa makamatngon si Brady nga nag-short pants lang diay gihapon si Nancy. Nakabantay ang dalagita nga kanunay’ng nagpasiklap kaniya si Brady ug motutok sa iyang mga paa panahon nga mangambyada ang iyang amigo.

“Putia g’yud nimo’g paa Nanz uy. Mosamot man ang akong kaibog nimo ana. Maayo kay nag-short pants ka karon,” ni Brady nga mipahiyom kang Nancy. Ingon sa misamot nga nagpaibog na si Nancy kaniya.   Gisigi’g bila-bila niini ang duha niya ka paa. Misamot nga mius-us ang short pants sa dalagita ug natataw na kaayo ang hamis niini nga mga paa. “Sus kanindot, ginhawa tawon Delfin,” matud ni Brady nga gipaagi na lang sa komedya ang iyang kahigwaos. (Sumpayan)