Tilaw-tilaw lang

Nalingaw kaayo si Brady nga nagsud-ong sa pipila ka tawo nga nangaligo sa gamay’ng bahin sa dagat likod sa Malacañang sa Sugbo. Paingon unta si Brady sa Talisay aron bisitahan ang iyang amigo sa Barangay Cansojong apan nadani ang iyang pagtagad sa nangaligo.

Nakahinumdom si Brady nga ang dapit nga iya karong gisud-ong mao kini ang nakita niya sa hulagway sa front page sa mantalaan nga daghan ang nangaligo sa dagat kaniadtong Domingo sa Pagkabanhaw. Gi-parking ni Brady ang iyang sakyanan daplin sa karsada ug nanaog siya sa awto.

Gianinaw niya ang palibot nga gikaligoan sa pipila ka tawo. Nasuta ni Brady nga dili kaayo tin-aw ang tubig mao nga naisip niya nga dili maayo’ng kaligoan ang mao nga dapit. Gikuyawan usab siya nga nagtan-aw kay nahinumdom siya nga kabahin kini sa pantalan kaniadto. Nagpasabot nga may igo-igo nga giladmon ang mao nga dagat ug nahimoan lang kini og daw gamay’ng baybayon tungod sa paghimo og tunnel nga anaa molagbas sa Plaza Independencia.

Mobalik na unta si Brady sa iyang sakyanan aron mopadayon sa pag-adto sa iyang amigo sa Talisay diha’ng nalantawan niya nga adunay tulo ka dalagita nga nagpaingon sa iyang nahimutangan. Nanglaktod kini paglakaw lagbas sa karaang building sa Compania Maritima. Pulos sila nagsul-ob og short pants. Bisan layo pa ang tulo ka dalagita, naka-type dayon siya sa diha sa tunga tungod sa kaangayan niini nga tan-awon tungod sa puti nga mga paa. Wala gayud masayop si Brady kay nakita niya diha’ng nagkaduol na ang tulo nga gwapa ang anaa sa tunga.

“Hala, naa na lagi nangaligo, maligo ta!” matud sa dalagita nga diha sa daplin nga miagni sa iyang mga kauban. Gitagad ni Brady ang mga dalagita. “Mangaligo mo miss? Dili ba na hugaw diha nga dagat?” giingnan niya ang mga dalagita.

Mipahiyom ang dalagita nga diha sa tunga nga nataypan ni Brady. “Agwanta na lang mi nga anha maligo kay layo man kaayo ang baybayon nga nindot kaligoan,” matud sa dalagita nga type ni Brady.

Mitukar g’yud dayon ang pagka buhemyo ni Brady sa tsiks. “Gusto mo maligo sa nindot nga kaligoan? Tana, ubanan ta mo,” tanyag ni Brady. “Asa man ta?” matud sa usa ka dalagita nga ingon sa tabian.

“Uban mo nako kay mangita ta’g beach nga nindot kaligoan sa Talisay. Naa man ko’y sakyanan,” matud ni Brady dungan sa pagtudlo sa iyang pula nga sakyanan nga gi-parking sa unahan. “Duna ka diay awto? Sigi manguyog mi nimo!” matud sa tabian nga dalagita. (Sumpayan)