I-deny

Dear Tita Salie,

Have a wonderful day. Just call me Vhanie, single pa apan dunay live-in partner nga maoy hinungdan nga mangayo ko karon sa imong panabang.

Taga Isla ko, Tita Salie,apan nia ko karon sa Cebu  kay duna man ko’y trabaho. Ug samtang nagtrabaho ko nakauyab ko ug nahimo nakong live-in partner.

Maglibog ko niya, Tita Salie, kun love ba gyod ko niya sa tinuoray kay i-deny man lang ko niya sa iyang mga friend ug sa iyang family. Kun dunay mangutana kaniya bahin kanako iya lang ingnon nga amiga ko niya.

Sakitan gyod ko, Tita Salie. Mao nga naglibog ko karon kun ako ba kining padayonon o bulagan na lang nako siya. Unsay maayo nakong buhaton? Palihog pasabta ko. Thank you very much.

* * *

Hello, Vhanie. Mas maayo seguro nga mag-estoryahanay mo sa imong partner mahitungod niini nga isyu. Siyempre, babaye ka, natural lamang nga masakitan ka kun i-deny ka sa imong boyfriend.

Tingali kun mauwaw siya nga duna siyay ka-live in mao nga ingon niini ang iyang itubag niya sa panahon nga dunay mangutana. Nasayod ko nga kitang mga babaye ganahan kaayo nga ipasegarbo sa atong uyab o bana apan wala niya kini buhata.

Hangyoa lang siya nga kun puyde kondili pa man ka matawag niyang asawa, bisan ipaila lang ka niya nga hinigugma. Kay tinuoray ang imo ngadto kaniya ug dili niya angay ikauwaw sa uban ug sa iyang pamilya. -- Tita Salie