Bayad sa Pagtabang

Gula 5

Nanglingkod sila si Kent ug Lynlyn niadtong nagbad-ay nga kahoy nga nag-umbaw sa baybayon. Matahom kaayo ang dagat nga sud-ongon gikan sa ilang nahimutangan.

Madungog ra gikan sa ilang nahimutangan ang hinaganas sa mga bawod nga mangapusgay inig-abot na sa lapyahan. Takulahaw lang nga nakaalinggat si Kent nga may talagsaon nga pagbati nga inanay nga miturok sa iyang kasing-kasing alang ni Lynlyn.

“Daku g’yud kaayo ko og utang kabubut-on nimo Kent. Kun wala ka pa, basin namatay lang ko didto sa karsada kay sakit kaayo ang akong kalawasan niadto’ng pagka-aksidente nako. Nabunal diay ang akong ulo sa karsada,” ni Lynlyn pa.

Igo lang miyango-yango si Kent nga mitutok sa dalaga. “Unya, gawas nga gidala ko nimo sa ospital, naikog kaayo mi nimo kay ikaw pa g’yud ang miatiman nako ug mibayad sa bayranan sa ospital. Wala pa g’yud makontento gihatod pa g’yud mi nimo dinhi sa Alcoy,” dugang ni Lynlyn.

Nagpahiyom lang si Kent nga namati kang Lynlyn apan ang iyang panan-aw gitakli niya ngadto sa mga bawod sa dagat nga tagsa-tagsa nga napusgay sa lapyahan.  Unya gilingi niya ang dalaga. “Kanindot unta Lyn no kun wala ka pa’y boyfriend kay may kahigayonan unta nga mahimo ko ikaw nga girlfriend,” nagpalain si Kent.

Abtik kaayo nga nakatutok si Lynlyn kang Kent. Mipahiyom ang dalaga nga nakadungog ni Kent nga militok sa mao nga mga pulong. “Ngano man diay og may boyfriend na ko, dili diay mahimo nga manguyab ka nako?” nagpahiyom si Lynlyn nga daw nangomedya.

Gitutokan ni  Kent ang dalaga. Ingon sa iyang gitimbang-timbang kun nagbinuang ba lang si Lynlyn sa iyang gisulti. “Abi nimo Kent, ang babaye dali ra kaayo makagusto og lalaki ilabi na kun buotan kini ngadto kaniya,” sa dalaga pa.

“Mao ba? Ako, buotan ba ko nganha nimo Lyn?” matud ni Kent nga aron pagtugkad kun may pagbati ba usab kaha si Lynlyn  kaniya. “Labaw ka pa sa buotan Kent, mora ka na gani og ikaw ang akong boyfriend nga maoy miatiman sa tanan nako nga panginahanglan sa akong pagka-aksidente.”

Daw nahisama sila si Kent ug Lynlyn sa mga leading man ug leading lady sa usa ka telenobela. Tingali kun ang ilang situwasyon nalakip pa sa eksena sa sine, nanghugyaw na ang mga batan-on nga kilig kaayo og love story.

Nagtinutokay sila’ng duha si Kent ug Lynlyn. Wala’y mga pulong nga nalitok ni Kent gawas sa pagpislit sa kamot sa dalaga.  (Sumpayan)