Isla Paraiso - Gula 156

“Tungod kana kay nagpatalinghog ka sa hulhog sa tentasyon,” ni Padre Judas.

“Usa gayod kaha ka tentasyon si Rey alang kanako, Padre Judas?” Nakasukot si sister Veronica nga mitutok pag-ayo sa pari.

“That’s it,” sa pari pa. “Usa na ikaw ka madre. Nasayod ka kun unsa ang angay alang kanimo. Si Rey dili angay sa sama kanimo, Sister.”

“Sabton ko ba niining puntoha nga sala ang paghigugma, Father Judas?” Nagkanayon si sister Veronica sa tumang kaseryoso sa panagway. “Buot bang ipasabot nga ang gugma nga maoy labing bililhong gasa nga gihatag sa Diyos masayop diay usahay?”

“Wala ka tingali mangayo’g lamdag gikan sa Diyos aron matugkad mo ang kamisteryoso sa gugma.”

“Giampo ko kini sa makadaghan, Father.”

“Hugti ang imong pag-ampo.”

“Gihugtan ko na. Apan mao gihapon ang nahitabo. Nagpadayon ang puwersa sa gugma sa pagbunlot kanako.”

“Usahay mahisalaag kita sa matul-id nga dalan, sister Veronica, tungod kay sayop ang paagi nga atong gigamit sa pagpakigbatok sa tentasyon.”

“Sabton ko ba nga nahisalaag ako sa akong gibuhat, Father Judas?”

Wala makatingog si Padre Judas. Miduko kini.

-- Sumpayan pa