Isla Paraiso - Gula 155

“Tungod kay natugkad ko, Padre Judas nga dili ako makatuman sa tanang gimbut-an sa akong bokasyon,” laktod nga tubag ni sister Veronica sa pangutana sa pari kaniya.

“Tungod ba kay nahigugma ka na?”

Miduko si sister Veronica. Ingon sa naulaw siya sa atubangan sa pari.

Si sister Veronica ingon sa nahilis sa tinan-awan ni  Padre Judas. Naabisan siya’g dila sa atubangan sa pari nga iyang higala. Maglisod siya’g pasabot sa pari nga matugkad niini ang kinatung-ang punto sa iyang mga katarongan.

“Ang simbahan wala magdili kanimo pagtuman sa sugo sa imong pagbati,” namulong si Padre Judas. “Wala usab magkondenar ang simbahan sa sama kanimo, sister Veronica. May pagbati ako nga ang kombento mao ang imong kalibotan.”

“Nagpuyo ako sulod sa taas-taas nga panahon dinhi sa kombento,” namulong na gayod si sister Veronica. “Sa sinugdan mao usab kana ang akong conviction, Padre. Nagtuo ako nga ang kombento mao na ang akong kalibotan.

Apan sa dihang nagkatagbo pag-usab ang duha ka dalan namo ni Rey, inanay niya nausab ang panud-ong ko sa kinabuhi. Mora ba’g dunay usa ka bahin sa akong kahimungawong nga nalamdagan ug nabuka ang akong mga mata sa kamatuoran nga akong gipanghimakak ug gilikay sa kahayag. -- Sumpayan pa