Bayad sa Pagtabang

Gula 2

Diretso nga gidala ni Kent si Lynlyn sa Chong Hua Hospital. “Lyn, Lyn, pagmata usa kay dia na kita sa ospital,” gipukaw ni Kent si Lynlyn dungan sa hinay’ng paghapuhap sa aping sa dalaga.

Gisugat sila sa duha ka hospital personnel nga nag-andam na daan og wheel chair. Nanaug si Kent sa awto ug mituyok siya sa pikas kilid sa awto dapit sa passenger side. Gibuksan niya ang pultahan ug mainampingon nga gigunitan ang kamot ni Lynlyn. “Dali kanaog na Lyn, lingkod diri sa wheel chair aron dad-on ka nila sa emergency room. Apason lang tika ha kay mangita pa ko’g kaparkingan sa awto,” giingnan niya ang dalaga. Gitulod na si Lynlyn paingon sa emergency room.

Mibalik dayon si Kent sa ospital. Nakita ni Kent nga naghigda na si Lynlyn sa usa sa mga katre sa emergency room. “Ikaw ba ang tagtungod sa pasyente?” gisukna si Kent sa nurse nga mikuha og detalyi kabahin sa pasyente.

Nahibulong ang nurse kay wala dayon makatug-an si Kent dihang gipangutana sa tinuod nga ngalan ug apelyedo sa pasyente, ingon man kun asa kini magpuyo. “Pasensya miss ha, ako ra man gud ang nakakita niya nga naaksidente ug akong gitabangan,” pasabot ni Kent. Giadto ni Kent si Lynlyn sa iyang katre. Gikuhaan og detalyi ang dalaga. Suheto si Kent sa mga detalyi nga gikinahanglan kay nakauban siya kaniadto diha’ng na-admit usab ang iyang igsoon sa Chong Hua.            

Giingnan si Kent sa doktor nga angay’ng ipa-admit g’yud si Lynlyn sa ospital kay aron ma-monitor pag-ayo ang iyang kahimtang. Nabunal diay ang ulo sa dalaga kay may gamay’ng samad nga ilang nakita nga natabonan lang sa iyang buhok.

Wala dayon makatingog si Kent. Nasayod siya nga dili basta-basta kun magpa-admit og pasyente sa pribado nga ospital kay mangayo kini og deposit. Apan nahinaykan na niya ang pagdala sa dalaga sa ospital.

“Sige dok, ato siya’ng i-admit apan sa air-con ward lang,” giingnan ni Kent ang doktor ug ang nurse. Giasikaso dayon ni Kent ang mga papeles aron ma-admit si Lynlyn sa ospital. Gigamit niya ang gamay niya’ng savings sa bangko aron ibayad sa deposit.

“Salamat kaayo sa imong pagtabang nako ha,” matud ni Lynlyn diha’ng nahigmata kini ug nakita nga diha pa sa iyang tupad si Kent. “Balhinon ka na sa ward karong taud-taud Lyn. Agwanta lang usa ta ha kay unsaon, apiki ta sa kwarta,” giingnan ni Kent ang dalaga.

Nahuna-huna ni Kent kun unsaon kaha niya aron masayod ang tagtungod ni Lynlyn nga na-ospital ang ilang anak. (Sumpayan)