Hilabihang gubota sa among lugar sa Barangay Lawa-Lawa sa dihang nabaniug na pag-ayo ang mga estorya bahin sa ungo nga magpalansang panahon sa Semana Santa o Biyernes Santo.
Hasta ang mga kasikbit nga baryo sa among dapit hasta na gani ang taga siyudad nga nakadungog sa maong balita nangoryuso gyud sa pag-adto sa among dapit aron lang gyud nga makasaksi sa ungo nga magpalansang sa krus.
Apan sa pag-abot na nila sa among dapit sa Barangay Lawa-Lawa diin baga na kaayo ang duot sa mga tawo nga mosaksi init ug habo-habo niadtong tungora wala lang nila igbali, apan pag-abot sa pipila ka mga gutlo naay sipa kaayo nga nag-anunsyo nga nagpasabot sa mga dumoduong nga dili tinuod nga ungo sama sa makita ninyo sa telebisyon o madungog sa radyo.
Kung dili usa kini ka ordinaryo nga tawo nga anggaan lang ni siya og ungo tungod sa iyang apelyido nga ungo. Pero sa tinuod-anay niyang pangalan Alexander Ungo mao kana ang tinuod pasabot sa emsi sa mga tawo. Kini diay ang pagpalansang ni Noy Alex sa matag Biyernes Santo iya diay kining tulomanon, kay lagi mao usab kini ang iyang gituohan nga iyang dagon, kay kini si Noy Alex usa ka banggiitan nga mananambal sa among dapit.
Mao nga sa matag Biyernes Santo dili gayud niya sipyaton ang pagpalansang sa krus, kay sa iyang pagtuo iya kini sa Diyos nga gitugyan ngadto kaniya. Pinangga gayud kita sa Diyos kay bisan sa iyang pagpakamatay sa krus iya gayud kitang gipadalhan og tawo nga maoy moatiman nato samtang wala siya nga ang maong tawo mao si Noy Alex Ungo. (Kataposan)