Gula 149
Mitindog si Rey ug human siya makasaludo ngadto sa kapitan, migawas siya sa buhatan niini.
Alas dose imedya na niadtong tungora.
Si Rey nakahukom nga dili na lang siya mopauli sa balay sa iyang giabtan sa Mambaling. Sa opisina na lang siya magpabuntag. Sa kuwerpo na lang siya matulog. Ugma daghan pa siyang atimanon.
Milabay ang usa ka semana. Usa niana ka adlaw, ang madre superyor nakadawat og tawag gikan sa Manila. Long distance call gikan kang Padre Judas. Nagpahibalo ang pari nga nahiabot na siya sa Manila. Ang pari misugilon nga nianang pagkahapon mahiabot na siya sa dakbayan sa Sugbo.
Human sa ilang panagsulti, gipahibalo gilayon niya ang tanan nga madre sa Orchids Sister’s Convent nga moabot si Padre Judas. Partikular na si sister Veronica. Nasayod siya kun unsa kasuod sila si sister Veronica ug Padre Judas.
Sa iyang bahin, si sister Veronica wala masayod kun angay ba siyang malipay sa gibalita sa madre superyor -- nga nia na gayod si Padre Judas sa Pilipinas. Nag-una ang iyang hunahuna. Nangagpas siya nga sa ilang panagsulti unya ni Padre Judas, posible nga magpakisusi gayod kini bahin sa iyang kinabuhi ug dili niya kalikayan ang pagtug-an kang Padre Judas mahitungod sa nahitabo sa iyang bokasyon. Unsa kahay ikasulti ni Padre Judas kun masayod kini nga mogawas na siya sa kombento? -- Sumpayan pa