Karon dayon, mahiuban ka kanako sa paraiso

Biyernes Santo. Kilas ang panan-aw ni Willy ning buntaga nga misagol sa panon sa mga membro sa relihiyosong kapunongan nga nagpahigayon og Pasyon Sa Krus sa Good Shepherd sa Banawa.

Pinayungyong ang iyang kalo ug nag-dark rayban siya aron dili maklaro ang iyang nawong. Pinangita siya sa mga tinugyanan sa balaod. Nahimo siyang notadong tulisan sa siyudad ug sa lalawigan sa Sugbo. Katapusan niyang nabiktima sa tulis mao ang usa ka negosyanteng magtiayon nga iyang napatay lakip ang bugtong anak dalaga niini. Nasakiyo niya ang tunga sa milyon ka pesos nga maoy gigamit niya sa makabuhong kinabuhi sa pagpuyo-uban sa lainlaing babaye ug sugal sa bigtime derby sa bulangan. Magbalhinbalhin siya’g puyo sa inabangang pension house. Hangtud nga nakapamalandong siya nga may panahon pa sa pagbag-o sa nahibiling yugto sa iyang kinabuhi. Sa edad nga 40, nagpabiling ulitawo nga way nailhang paryente dinhi sa siyudad sa Sugbo ug gusto niyang maghinulsol sa iyang mga sala. Ug unang lakang sa iyang pagbag-o karon, mao nga magpenetensya siya sa pagduaw sa tanang estasyon sa Krus, sa mga pag-antos ni Ginoong Hesukristo sa dalan paingon sa Kalbaryo.

Mao nga atol ning kasaulogan karon sa Biyernes Santo, ania karon si Willy sa Good Shepherd alang sa himuon niyang pagpenitensya ug unya, misugod dayon siya sa pagsubay sa Dalan Sa Krus ni Hesukristo paingon sa Kalbaryo.

Nag-ampo dayon si Willy sa unang estasyonan, diin gihukman si Hesukristo sa kamatayon. Paspas ang iyang pagtungas sa ikaduhang estasyon nga mipas-an si Hesus sa iyang krus. Padayon nga nangaliya ug nag-ampo si Willy. Nahiabot siya sa ikatulong estasyon, diin natumba si Hesus sa unang higayon. Sa ikaupat nga estasyon, gitagbo si Hesus  ni Mama Mary. Padayon nga nag-ampo si Willy. Nakatungas na usab siya sa ikalimang estasyon, diin si Simon, miayuda ni Hesus sa pagpas-an sa krus. Wala batia’g kakapoy si Willy nga mitungas sa ikaunom nga estasyon, nga gitrapohan ni Veronica ang nawong ni Jesus. Sa ikapito ka estasyon, hugot nga gitutokan ni Willy ang rebulto sa pagkatumba ni Hesus sa ikaduhang higayon. Sa ikawalo nga estasyon, makita ang rebulto ni Hesus nga daw nagmaymay sa kababayen-an sa Herusalem. Paspas nga mitungas si Willy sa ikasiyam nga estasyon, nga natumba na sab si Hesus sa ikatulong higayon. Padayon ang pag-ampo ni Willy. Naabot na usab siya sa ikanapulong estasyon, diin gihuboan na si Hesus sa iyang sapot. Dugay nga nakapamalandong si Willy sa paghiabot na niya sa ika-onse nga estasyon, diin gilansang na si Hesus sa krus. Hilom siyang nakatuaw.

“Ginoo, pasayloa ko sa tanan kong mga sala...!”

Sa ika-dose nga estasyon nga namatay na si Hesus, hugot nga nitutok si Willy sa nagdupang rebulto ni Hesus nga nilungay na ang ulo. Unya, kalit lang nga milanog ang masipang buto-buto sa mga armas-de-fuego. Nagkaguliyang ang panon sa katawhan nga namalandong sa matag estasyon sa krus. Misayaw ang lawas ni Willy nga natusak sa mga bala. Nadungog niya nga may misinggit.

“Notadong tulisan kanang tawhana! May ganti ang iyang ulo kun madakpan, buhi o patay...!”

Nahagba si Willy sa tiilan sa krus. Sa danag niyang kahimatngon, nagping-it siyang mihangad sa krus nga rebulto, diin nagdupa si Hesus.

“G-Ginoo! A-ayaw ko’g kalimti kun tua na ka s-sa l-langit!”

Daw misulod sa pandungog ni Willy ang tubag ni Hesus kaniya.

“Karon dayon, mahiuban ka kanako sa paraiso...!”

Nahagba ang lawas ni Willy sa tiilan sa krus. Nagkaub siyang nabugtoan sa gininhawa. (Kataposan)