Isla Paraiso - Gula 143

Ang tulisan nga gipusil ni Rey, sa dihang iyang gilung-an pagpusil nga nahasarasay na sa bungbong, inanay nga nalusno. Ug nalup-og kini sa salog nga wala nay kinabuhi.

Human matino ni SPO3 Rey Corpuz nga patay na ang tulisan nga iyang gipusil, gidali niya pagpunit ang armalite nga nabuhian niini. Unya midali siya pagpaingon sa laing lawak nga bukas gihapon ang pultahan. Wala siya mosulod. Diha ra siya sa kilid sa pultahan ug ang iyang kamot nga nagunit sa armalite lamang ang gipasulod sa pultahan. Gikablit niya kini. Iyang gisuhid sa mga bala ang palibot sa lawak.

Sa dihang milunga siya pagpabuto, wala’y mibalos pagpabuto gikan sa sulod. Sama kakalit sa kilat, misulod si Rey sa lawak nga hugtanong naggunit sa armalite sa iyang tuong kamot ug Uzi sa iyang walang kamot. Andam na ang iyang mga kamot sa pagkablit sa gatilyo sa mga armas nga iyang gigunitan kun may kaaway siyang makita didto sa sulod. Giigmat niya’g maayo ang iyang tinan-awan.

Nasuta niya nga wala’y tawo sa sulod sa maong lawak. Dihadiha midali siya paggawas sa lawak aron mao na usay sunod nga susihon ang sunod nga lawak. Apan sa dihang giluwa na siya sa pultahan, maoy misugat kaniya ang nagpungasing mga bala gikan sa usa ka kaaway. Maayo gani kay nakadali siya pagligid sa salog. Wala siya mapugnit sa mga bala nga gibuga sa armas sa kaaway nga mipusil kaniya. -- Sumpayan pa