Grabe’ng pagmahay

Gula 6

Sanglit dili kaayo maantigo mosulti og ininglis ang mga ginikanan ni Jasmin, igo ra sila naminaw nga wala kaayo makasabot sa gisulti sa boyfriend sa ilang anak. Si Jasmin ra ug Grace ang nakigsultihanay ni Hanz.

“Gusto kuno ni Hanz nga magminyo dayon mi Pa, Ma,” gihubad ni Jasmin ang gisulti kaniya ni Hanz. “Wala mi pagsupak day  kun mao kana ang inyong masabotan,” matud sa amahan.

Tuod, pagkaugma dayon sa buntag, nagpatabang si Jasmin sa silingan nila nga kanhi konsehal sa Borbon, si Roy Melgo aron mahikay ang ilang kasal ni Hanz. Wala g’yud tuod magdugay ang pag-andam sa mga dukomento gikan sa munisipyo ug ngadto sa simbahan.

Nakasal sila si Jasmin ug Hanz. “Dalia ra day uy, minyo ka na g’yud ug kwartahan nga foreigner pa ang imong nabana,” giingnan ni Grace ang iyang amiga dihang migawas na sila sa kasal. Walay daghang bisita nga mitambong sa kasal.

Nananghid si Jasmin sa iyang ginikanan nga makigpanuroy si Hanz sa dakbayan sa Sugbo. Nagpahiyom si Grace nga namati kay nakasabot siya sa tumong sa langyaw. Minyo na gud sila si Jasmin ug dili man sila makalugar sa gamay kaayo nga balay sa ginikanan sa iyang asawa.

Misamot og kaparaygon si Hanz kang Jasmin. Nalipay kaayo nga nagtan-aw ang mga ginikanan ni Jasmin nga gipangga sa langyaw ang ilang anak. Sa dakbayan, mi-check-in sila si Jasmin ug Hanz sa daku’ng hotel sa Lahug.

Daku kaayo nga kwarto sa hotel ang gikuha ni Hanz ug sa pikas kwarto, didto usab mag-ukopar ang kauban ni Hanz nga nagsilbi nga iyang bodyguard. Gikulbaan kaayo si Jasmin kay nasayod siya nga kumbatihon g’yud siya’g maayo sa iyang bana.

Sulod lang sa hamubo nga panahon, nakat-on dayon og grabe’ng pagmahal si Jasmin kang Hanz tungod sa iyang kabuotan. Gisuroy usa ni Hanz si Jasmin sa rooftop sa hotel. Nabag-ohan ang probinsyana sa iyang nakita nga maanindot nga talan-awon sa siyudad.

Miorder si Hanz og duha ka botelya nga beer. Gitagsaan nila ni Jasmin. Mibalibad si Jasmin apan gihangyo siya sa iyang bana nga motilaw lang. Ingon sa nalipong dayon si Jasmin nga nakainom.

Taud-taud, namalik na sila sa ilang kwarto. Giparaygan dayon ni Hanz ang maanyag niya nga Filipina nga asawa. Nagpungasi ang mga hawok ug parayeg sa British nga bana ni Jasmin. Gipasagdan na lang g’yud ni Jasmin ang iyang bana nga miangkon sa iyang kaputli. (Sumpayan)