Grabe’ng pagmahay - Gula 3

Dili kaayo mahalon nga selpon ang gipalit ni Jasmin kay gisaaran man siya sa British nga si Hanz nga hatagan siya og moderno nga selpon nga wala pa dinhi sa Pilipinas.

Dako pa og nasubra si Jasmin sa gipadala nga 200 dolyares ni Hanz nga napailisan niya og P9 mil. Kanunay na sila nga mag-chat ug wala gayud magpugong niini ang iyang mga ginikanan.

Wala na usab kaayo magkalisud-lisod ang pamilya ni Jasmin sa ilang pagkaon kay mitabang na man og palit ang dalaga sa ilang mga kinahanglanon. “Giswerte ka g’yud kaayo day. Ako kanus-a pa kaha makakita og foreigner nga ingon kabuotan ni Hanz,” matud ni Grace nga amiga ni Jasmin.

“Gikuyawan ko Grace kay sa kataposan namo nga chat, nanguyab na si Hanz nako. Gwapahan g’yud kuno siya magtan-aw nako day,” matud ni Jasmin. “Wala man g’yud magbinuang si Hanz kay gwapa ka man g’yud tinuod day,” ni Grace.

Gitambagan ni Grace ang amiga nga sugton dayon si Hanz sa sunod nila nga pag-chat. Nabatyagan g’yud hinoon ni Jasmin nga gaan kaayo ang iyang buot ngadto sa British national ilabi na kun magkomedyahay sila gamit ang webcam.

Tuod, gituman g’yud ni Jasmin ang gitambag kaniya sa amiga nga si Grace. Gisugot niya si Hanz dihang subli sila nga nag-chat. Nasabot ni Jasmin nga pwerte’ng lipaya sa British national nga iyang gisugot.

Gitug-anan man gud ni Jasmin ang foreigner nga wala pa gayud siya makabaton og boyfriend. Pwerte nga nakapangindahay sa foreigner nga siya unta ang una nga mahimong boyfriend sa Filipina.

Matud ni Hanz nga gusto g’yud siya nga ang mahimo niya’ng asawa usa ka Filipina kay aduna siya’y suod kaayo nga higala nga nakapangasawa’g Filipina hilabihan kabuotan.

Milabay ang mga adlaw, daghan kaayo og mga package nga gipadala ka’ng Jasmin ang boyfriend niya nga si Hanz. Malipayon kaayo si Jasmin kay buotan usab si Hanz ug gitubag ang ilang mga panginahanglan sa panimalay.

Usa ka higayon sa ilang pag-chat, misugyot si Hanz nga minyoan na lang niya si Jasmin. Wala makatingog si Jasmin kay nakalitan g’yud siya sa gisulti sa iyang boyfriend.

Alang kang Jasmin dili pa siya andam sa kinabuhi’ng minyo. Apan ang iyang amiga nga si Grace mitambag nga dawaton ang tanyag ni Hanz nga sila magminyo na. “Kun ako pa ana day, tulin pa sa tabanog nga akong uyonan nga makigminyo sa British,” ni Grace pa.

“Bitaw day Jasmin, gusto man kaha nga makigminyo nimo kanang foreigner, minyoi dayon,” matud sa amahan ni Jasmin. – (Sumpayan)