Ang kamapaubsanon

Gula 5

Human katug-ani ni Mamer si Sherlyn sa iyang kapakyasan sa gugma, nakapahiyom ang dalaga. “Kun mao, dili diay ko angay’ng maguol Mer kay dili pa kini kataposan sa akong love life,” ni Sherlyn pa. “Tinuod kana Sherlyn, basin og wala gayud kita gitagana ngadto sa atong mga kanhi karelasyon,” gidasonan ni Mamer ang dalaga. Pag-serve na sa ilang order, nangaon sila.

Si Mamer maoy mibutang og init nga sabaw ngadto sa gamay’ng panaksan sa dalaga. “Mao g’yud na ang magustohan sa babaye ngadto sa lalaki Mer, ang iyang pagka-caring kaayo,” ni Sherlyn pa nga nagpahiyom.

“Mao ba? Kanindot kaha no kun mabihag nako ang imong kasing-kasing kay total wala na man ‘sab ko’y girlfriend karon,” matud ni Mamer apan nagngisi ang ulitawo.

Wala motingog ang dalaga apan nagpahiyom kini nga mitutok kang Mamer. Mora’g iyang gibana-bana kun wala ba magbugal-bugal kaniya ang ulitawo.

“Para nako Sherlyn, puslan man nga naguba ang inyong relasyon ug sa imong boyfriend tungod kanako, mas maayo pa nga ato na lang g’yud nga dayonon kana kun may pagbati ka ‘sab nako,” matud ni Mamer.

Daw natuk-an si Sherlyn, wala dayon makatingog. Nindot kaayo ang arangkada sa iyang pagpanguyab sa dalaga kay gipaagi kini sa komedya sa sinugdanan.

“Bitaw ‘sab. Puslan man nga gikatahapan ‘ta nga adunay relasyon mas maayo nga tinud-on na lang,” ni Sherlyn. Nakasabot na si Mamer nga dili siya mapakyas sa iyang pagpanguyab sa dalaga.

Misamot nga gipakita ni Mamer ang iyang pagpangga ngadto ni Sherlyn. Igo na alang kaniya nga nakatug-an siya sa iyang proposal ug ang dalaga nasayud nga may pagbati siya kaniya.

Nanggawas sila si Mamer ug Sherlyn sa restaurant. “Unya, asa man ta karon Sherlyn?” gisukna ni Mamer ang dalaga. Abtik kaayo nga nakatubag ang dalaga, “suroy-suroy lang, palabay sa oras.”

“Pwede ba og manan-aw ta’g sine?” giingnan ni Mamer ang dalaga. Misugot ang dalaga apan adunay kondisyon. “Dili ka man kaha abusado ngadto sa babaye?” pangutana ni Sherlyn.

Kalma kaayo nga giingnan ni Mamer ang dalaga nga dili siya sama sa ubang lalaki nga abusado kaayo sa mga babaye. “Pormal kaayo ko ngadto sa mga babaye Sherlyn, ilabi na kun sama kanimo nga akong gipangga,” ni Mamer.

“Kun mao kana, safe diay ko nga makig-uban nimo Mer. Na hala, tana,” matud ni Sherlyn nga migunit sa bukton sa ulitawo. Nanulod sila sa sinehan. Husto g’yud kay mga alas siete pa sa gabii ug mahuman ang salida alas nueve. – (Sumpayan)