Isla Paraiso

Gula 131

Ug sama kakalit sa kilat, gipasiga ni Rey ang plaslayit  ug iya kining gilabay gilayon ngadto sa salog nga may igong gilay-ong sukad sa dakong haligi nga iyang gipasalipdan. Paghagsa sa plaslayit  sa salog nga semento, misiak gilayon ang masipang mga buto nga mialingawngaw ug milanog sa palibot.

Ang plaslayit nga giitsa ni Rey Corpuz sa salog maoy gitabangan og pusil sa mga kaaway nga nanghupo sa palibot nga wala niya makita. Nabungkag ang plaslayit nga naigo sa mga bala.

Wala gayod masayop si Rey sa iyang katahap nga may mga kaaway nga nakapaniid sa iyang pagsulod ug naghulat lamang sa hustong higayon sa paluthang kaniya. Maayo gani nga nakahunahuna siya’g paagi sa pag-ilad sa mga kaaway. Gipusil nila ang plaslayit nga iyang giitsa sa pagtuo nga iya kining gigunitan. Mipasalipod pag-ayo si Rey sa haligi samtang nagpungasi ang mga bala gikan sa armas sa mga kaaway.

Pagkabati sa mga buto ang mga kauban ni Rey nag-iyahay’g sulod sa bukas nga pultahan sa bodega aron pag-ayuda kaniya. Nagpabuto usab sila sa ilang mga armas tumong sa dapit diin didto maggikan ang mga butobuto.

Ang kasipa sa mga butobuto sa hinagiban ug sa kapolisan misangag sa dapit. -- Sumpayan pa