Masuko badlongon

Dear Tita Salie,

Maayong adlaw kanimo ug ingon man usab sa tanang nagsunod sa imong column. Tigbasahan gyod ko og Banat News diri sa among dapit kay mao man kini ang among kalingawan kada buntag.

Tawga lang ko og Dandan, ulitawo ug nagpuyo sa Carcar, Cebu. Ang akong problema mahitungod kini sa akong girlfriend nga medyo may pagka badlongon usab.

Dili ko moinom og ilimnong makahubog ug dili pod ko manigarilyo. Apan kining akong uyab moinom ug mahubog gyod siya. Kun akong badlongon masuko man hinuon. Dihay kausa nga akong gikasab-an, Tita Salie, tungod kay moinom man siya nga walay kaon ug nasayod ko nga makadaot gyod kini sa lawas. Apan wala gyod ko niya panumbalinga.

Love kaayo nako siya, Tita Salie, ug gusto na ko nga mausab siya. Unsa may akong buhaton? Palihog pasabta ko. Salamat sa pagtagad.

* * *

Good day Dandan,

Ang imong uyab tataw kaayo nga pakawala ug barkadista. Ug kining iyang pagkabisyosa nagsugod gyod kini sa mga isyus ug problema sa iyang pamilya. Tingali kun gubot kaayo ang ilang pagpuyo o kaha gikan siya sa usa ka broken family diin ang mga anak napasagdan na lang ug wala gyod intawon maatiman.

Kining imong uyab wala gyoy kalipay sa ilang panimalay. Ug mao kini ang hinungdan kun nganong adto sa barkada ang iyang padulngan. Tungod kay didto sa iyang barkada gidawat man siya ug malipay siya.

Busa mao kini ang imong hagit karon isip uyab nianang bayhana. Kun masabtan nato siya dili ka masuko kaniya. Kondili maluoy hinuon ka tungod sa iyang kasinatian. So, angay nimo siyang tabangan. Imong ipakita kaniya nga concern ka ug love nimo siya. Ihatag kaniya ang wala mahatag sa iyang pamilya. Aron diha na siya motuo kanimo ug dili na sa iyang barkada.

-- Tita Salie