Kaanyag ni Danessa

Gula 6

Gisuginlan ni Efren ang iyang amigo nga gisuwerte siya sa pag-adto sa dagat nga siya ra kay didto gikaila niya si Danessa nga usa ka maanyag nga negosyante dinhi sa dakbayan sa Sugbo.

Bisan sa ilang kabisi sa trabaho apan makahigayon gayud sila si Danessa ug Efren sa pagbayloay og text messages. Bisan unsa na lang gud ang ilang hisgutan, ilabi na panahon sa gabii. Nakapasamot kini sa ilang kasuod. Usa ka adlaw, nakadawat og text message si Efren gikan ni Danessa nga nagpahibalo kaniya nga na-admit siya sa ospital.

Nakurat kaayo si Efren tungod kay nagteksanay pa gani sila nianang gabhiona. Gipangutana niya si Danessa kun asa kini nga ospital. Nagdali si Efren sa pag-andam aron mosayo na lang og lakaw kay mohapit usa siya sa ospital aron bisitahan niya si Danessa. Wala niya pahibaw-a si Danessa nga nagplano siya nga mobisita sa ospital.

Nagpakisayod si Efren sa information counter sa ospital kun asa nga room ma-admit si Danessa. Misakay siya sa elevator paingon sa Room 822 sa Chong Hua Hospital. Wala na moagi sa nurses’ station si Efren ug mideritso na siya pag-abli sa pultahan sa kwarto. Gihinay niya paglubag ang siradora aron dili siya makahimo og kasikas.

Mora’g adunay giukoy si Efren kay hinay kaayo ang iyang mga lihok. Wala g’yud makamatngon si Danessa sa iyang pagsulod kay nagkalingaw kini pagtan-aw sa Facebook sa iyang cellphone. “Kumusta ka na Ness?” matud ni Efren nga mihikap sa bukton sa iyang amiga. “Uy, hala gikuyawan ko nimo Efren da,” matud ni Danessa nga nakapahiyom pagkakita ni Efren.

Nakita ni Efren nga diha sa lingkoranan natulog si Nissan. “Tua pa mipauli ang yaya ni Nissan,” matud ni Danessa. “Kun mao, wala ka diay masugo-sugo karon. Palitan ko ikaw og imong makaon sa atbang nga fast food store,” matud ni Efren.

Sige Efren kay gusto ko mukaon sa ilang breakfast meal. Wala ko mukaon sa gihatod nga pagkaon kay wala ko maanad og pagkaon sa ospital,” ni Danessa.

Human matug-an ni Danessa kang Efren ang iyang nagustohan nga pagkaon, midali si Efren pagkanaug aron nga mapalitan niya’g pagkaon ang maanyag nga amiga. Malipay si Efren nga makasilbi ni Danessa.

May nahuna-hunaan si Efren. Mopalta na lang siya sa trabaho aron maubanan niya si Danessa sa ospital kay wala ma’y makabantay kaniya. “Pag-syur diha Efren uy. Kasuk-an ka gani sa imong gitrabahoan ug taktakon ka,” nagngisi si Danessa. Giteksan ni Efren ang personnel head sa ilang kompaniya ug gipahibalo nga dili siya mo-duty. – (Sumpayan)