Isla Paraiso

Gula 125

Dihadiha nangandam ang mga polis nga sakop sa TRS. Gihulat na lang nila ang go-signal ni Rey.

Paghagtok sa ikanapulo ang takna sa kagabhion, si Rey mimando sa iyang mga kaubang polis sa pagsakay na sa tulo ka sakyanan nga nag-urong sa gawas sa kuwerpo. Sangkap sila sa mga armas. Wala sila magsul-ob og uniporme. Silang tanan nagsul-ob og diyaket nga itom ug gibanganan og puti nga panapton ang ilang ulo.

Sa ilang dughan nagbitay ang ilang ID. Ang papel sa orden de aresto gisulod ni Rey sa ilawom nga bulsa sa iyang diyaket. Iya kining gipangayo gikan kang Capt. Benale kaganina sa dayon nang human sa ilang briefing. Gikinahanglan kaayo kini sa matag operasyon nga ilang himuon sama niini karon aron dili mopalpak ang ilang mga plano.

Sa dihang nakapahimutang na ang tanan sa sulod sa tulo ka sakyanan, miaginod gilayon kini ug mihinay pagsubay sa aspaltadong dalan. Ang sakyanan nga giluwanan nila ni Rey maoy nag-una. Gisundan kini sa duha ka sakyanan nga giluwanan sa iyang mga kauban. Mikabat silang tanan sa kalim-an ka polis.

Wala pay katloan ka gutlo sukad sa ilang paglarga, ang sakyanan nga nag-una miurong dili kaayo layo sa gate sa usa ka karaang bodega. Misunod usab paghunong ang laing duha pa ka sakyanan nga gisakyan sa kapolisan. Diha-diha mikiros pagpanganaog ang mga tinugyanan sa balaud.  -- Sumpayan pa