Kaanyag ni Danessa

Gula 5

Wala g’yud magdahom si Efren nga makapalag siya og amiga sa pagkaligo niya sa dagat nga siya ra’ng usa. Tukma usab kaayo nga si Danessa wala’y kauban gawas sa iyang bata nga si Nissan ug ang yaya sa iyang anak.

Nagbayloay sila og contact numbers si Efren ug Danessa. Sa pagpamauli na, nagkasabot sila nga sundan ni Efren ang sakyanan ni Danessa aron usab makatultol kini sa gipuy-an sa maanyag niya nga amiga.

Dili usab g’yud diay basta-basta  kini si Danessa kay nakaangkon man kini og kotse. Hangtud nga misangko sila sa usa ka dapit sa Barangay Banilad, dakbayan sa Mandaue. Nanaug gikan sa kotse ang yaya ni Nissan ug gibuksan ang ganghaan sa balay.

Dihang naabli na, gipasulod ni Danessa ang kotse ug giparking. Migawas pagbalik si Danessa didto sa nahimutangan ni Efren nga naghangad-hangad sa balay. “Sulod usa Efren para magkasultihanay usa kita kadiyot,” matud ni Danessa.

Wala kawanga ni Efren ang pagdapit ni Danessa. Misunod siya ni Danessa nga misulod. “Diha lang na’ng imong motor kay wala may kawatan dinhi sa among lugar,” ni Danessa pa nga nagpahiyom.

“Nindot ka man diay kaayo’g balay Ness, dato ka g’yud diay,” matud ni  Efren nga mora’g nagpangikog na karon kang Danessa. “Gipatukod ni kaniadto sa akong ex-boyfriend nga Hapon kay dato man kadto kaayo.

Anak siya og dakung opisyal sa Japan,” matud ni Danessa.  Miyango-yango si Efren. Unya mitumaw sa iyang kaisipan nga pangutan-on niya si Danessa kun hain na ang Hapon. Apan wala pa gani siya makasulti giunhan na siya ni Danessa.

“Tingali mangutana ka kun hain na ang Japanese nako nga ex-lover? Nagbuwag mi Efren kay kusog kaayo managmal kun makainom. Bisan og buotan kaayo ko niya apan mawala ang maayong pamuot kun mahubog,” pasabot ni Danessa.

Dili gayud makatoo si Efren. “Mao ba? Kaswerte na unta niya nga nakapangasawa nimo Ness nga gwapa kaayo. Kaamgid-amgid ka man gani ni Anne Curtiz sa kaanyag,” matud ni Efren nga mihimo’g gamay’ng bulatik sa amiga.  Nakapahiyom si Danessa. “Wala’y swerte. Apan sagdi na lang total gihatag na man niya nako kining mao nga balay ug misaad nga dili na magsamok namo ni Nissan. Gihatagan ‘sab ko niya og gamay’ng kwarta nga gigamit nako sa negosyo.”

Nasayran ni Efren nga negosyante diay si Danessa. Ingon sa nakapangindahay si Efren nga kaanindot unta kun iya kining ikarelasyon. “Sige Ness, dili na lang ko magdugay kay hibalo ko nga gikapoy ka sa pagkaligo sa dagat. Kontakay lang ta,” matud ni Efren. – (Sumpayan)