Kaanyag ni Danessa - Gula4

Gibunlot ni Efren ang pundo nga pisi aron moadto ang gakit daplin sa dagat ug hangtod nga miabot kini sa dapit nga taga hawak na lang ang tubig sa nahimutangan nila ni Danessa. Gigunitan ni Efren ang kamot sa bata nga si Nissan aron makatungtong kini sa kawayan nga gakit. Sayon ra nga nakatungtong sa gakit sila si Danessa ug ang kauban niini nga babaye nga maoy yaya ni Nissan. Gibunlot na usab ni Efren ang pundo nga pisi nga didto gi-angkla sa lawom nga bahin sa dagat aron mobalik sa lawom ang gakit.

Nalipay kaayo ang bata nga nakaabot siya sa mao nga bahin sa dagat. “Nindot diay dinhi no? Maayo kay duna pa g’yuy gamay’ng atop nga kapasilongan kun init na,” matud ni Danessa.

“Basin og moapas ang imong husband Ness ug lainon niya pagsabot nga nakig-uban ka nako dinhi sa gakit,” mapanagan-on kaayo si Efren tungod kay dili siya gusto nga makamugna lang unya sa panag-away ni Danessa ug sa iyang bana.

“No problem Efren, wa man ko’y bana. Wala man kami makasal ug ang Hapon nga amahan ni Nissan,” matud ni Danessa. Nahinumdom tuod si Efren sa gisulti sa bata nga si Nissan kaganina nga wala siya’y papa.

Nasabtan ni Efren nga Japanese national g’yud diay ang amahan sa bata ug mao nga ang ngalan niini Hinapon g’yud nga pulong. Nakahinumdom si Efren sa iyang nabasahan kaniadto sa libro nga ang kahulogan sa pulong nissan mao ang milagro.

Apan misikat kini nga pulong tungod kay usa kini ka brand sa sakyanan nga buhat sa Japan. Ingon sa dili makatoo si Efren nga ang Hapon nga boyfriend ni Danessa nga amahan gani sa ilang anak nakaako sa pagpakigbuwag kaniya.

“Dili g’yud katuohan Ness nga duna ka na’y anak. Mora ka lang gihapon og dalaga,” giingnan ni Efren si Danessa. Igo lang mipahiyom si Danessa nga naminaw ni Efren. “Makamao ka ba nga molangoy Ness? Moambak ta gikan dinhi sa gakit,” giingnan ni Efren si Danessa.

Una nga misawom si Efren ug dugay kini nga mitunga. Natagbaw si Danessa paglantaw kun hain na si Efren. Milabay na lang ang mga dos minutos apan wala makabantay si Danessa nga hilom diay nga si Efren didto mitunga sa luyo nga bahin sa gakit ug nagpasalipod.

“Hala, wala na motunga si Efren. Asa na kaha to?” matud ni Danessa nga natagbaw og aninaw ilawom sa dagat. Kakataw-onon si Efren nga nagpaniid sa ngilit sa gakit luyo ni Danessa.

Misawom siya pagbalik nga wala mohimo’g bisan gamay’ng kisaw sa tubig dayon mitunga didto sa atubangan ni Danessa nga nagngisi. “Hala, grabeha’ng taasa nimo og utong uy!” tuaw ni Danessa nga nagpahiyom ug daw dili makatoo. – (Sumpayan)