Isla Paraiso - Gula 123

“Kinsa ba diay kadtong nanawag?” Pakisusi ni Rey.

“Si Capt. Benale kadto, Sir,” tubag ni Corporal Benturada. “Paadtoon kita sa iyang buhatan karon gayod dayon.”

“May nahitabo na sab tingali,” nangagpas si Rey.

“Malagmit, Sir.”

Ug misamot pa kakusog ang dagan sa ilang gisakyan. Gipatingog nila ang siren aron mohatag og lugar kanila ang mga sakyanan nga nanag-una.

Pag-abot nila sa buhatan ni Capt. Benale, didto na sa sulod ang ubang mga polis nga sakop sa Theft and Robbery Section sa presinto 10 nga gipangulohan ni Rey. Gipahibalo na diay usab sila sa kapitan.

“Karon nga ania na kamong tanan,” matud sa kapitan nga mibarog sa atubangan sa iyang mga tawo nga nanaglingkod, “sugdan na nato ang briefing alang sa usa ka operasyon.”

Nahilom ang tanang mga polis. Ang ilang mga mata didto ra kang Capt. Benale.

“Sumala sa intelligence report nga akong nadawat,” mipadayon ang kapitan sa pagpamulong, “ania ra sa siyudad maglublob ang mga tulisan nga nanghasi karon sa dakbayan sa Sugbo ug sa silingang siyudad ug kalungsoran.”

Mihunong pagsulti ang kapitan. Mihimo siya’g lima ka lakang ug gikawhat kadtong usa ka kartolina nga gilukot nga nahimutang sa tumoy nga bahin sa iyang lamesa simpig sa bungbong. -- Sumpayan pa