Kaanyag ni Danessa - Gula 3

Miduol ang Mama sa bata sa nahimutangan ni Efren. “Nakigsulti ra kanako si Nissan. Imo ba siya’ng daughter?” giunhan ni Efren ang babaye. Mipahiyom ang babaye kang Efren. “Gikuyawan baya kaayo ko Nissan kun hain ka na. Tua si Yaya nimo akong gikasab-an,” sa babaye pa.

Gitunol ni Efren ang iyang kamot ngadto sa babaye ug nagpaila siya sa iyang kaugalingon. Naglamanohay sila si Efren ug ang babaye dungan sa pagtug-an sa iyang ngalan. “Danessa ang akong ngalan,” matud sa babaye nga ang pahiyom makapatintal gayud sa mga lalaki.

“Hala friend na sila si Mama ug si uncle Efren!” matud ni Nissan nga nalipay kaayo nga nakakita nga naglamanohay ug nagtinutokay sila si Mama niya ug si Efren. Gibadlong ni Danessa ang iyang anak pinaagi sa pagtutok niini.

“Sori kaayo ha, talkative g’yud kaayo ni’ng akong anak,” matud ni Danessa. Ingon sa dili makatoo si Efren nga may anak na si Danessa tungod kay seksi gihapon kaayo ang iyang lawas.

“Tana Nissan kay natagbaw na kadto pagpinangita nimo ang imong yaya. Nganong wala ka man moipon sa imong mga kauban Efren?” ni Danessa pa.

Gitug-anan si Danessa ni Efren nga siya ra’ng usa ang mianhi sa beach kay wala modayon ang iyang amigo sa ilang sabot nga mangaligo. “Mao ba? Sigi, biyaan ka namo Efren,” matud ni Danessa.

Igo lang miyango si Efren samtang nagpahiyom nga mitutok ni Danessa. Sa hilom nakadayeg kaayo si Efren sa talagsaong kaanyag sa inahan sa bata nga una niya’ng naamiga.

Milangoy pagbalik si Efren paingon sa usa ka kawayan nga gakit nga naglutaw sa lawom nga bahin. Ibabaw sa gakit adunay lapad nga tabla nga nindot kalingkoran ug mahimo pa gani nga kahigdaan. Misaka si Efren sa gakit. Didto siya manukad sa paglantaw ug gipaliraw niya ang iyang mga mata sa mga tawo sa daplin. Gusto niya nga makit-an pag-usab si Danessa.

May nabantayan siya nga duna’y nagwara-wara sa daplin. Wala masayop si Efren, si Danessa ug Nissan ang nagwara-wara kaniya. Mibawos si Efren sa pagwara sa iyang kamot.

Mihimo’g sinyas si Danessa nga gusto sila nga moadto sa gakit nga nahimutangan ni Efren. Gilugakan ni Efren ang pisi nga gipundo dapit sa lawom nga bahin aron makapaduol ang gakit sa daplin.

Anam-anam tuod ang gakit nga mipadaplin. Nakita ni Efren nga miubog na sa tubig sila si Danessa ug Nissan ug diha usab ang laing babaye nga nasabot ni Efren nga mao ang yaya sa bata. – (Sumpayan)