Isla Paraiso

Gula 121

“Gusto niya nga anhi lang sa sakyanan maghulat,” laktod nga tubag ni Rey.

“Okey lang, Sister,” misagbat si Corporal Benturada. “Wala man sab ko laayi nga naghulat kang Sir.”

“Unya,” ni Rey pa, “adto na kami.”

“Sige,” matud ni sister Veronica. “Pag-amping kamo.”

“Thanks,” ni Rey dayon niyang angkas sa sakyanan. Didto siya mopahimutang sa unahang lingkoranan tupad kang Corporal Benturada nga maoy magmaneho.

Gipaandar gilayon ni Corporal Benturada ang makina sa sakyanan sa dihang nakapahiluna na si Rey sa iyang kaugalingon.

Gikawayan ni Rey si Veronica sa dihang misugod na pagdagan ang ilang gisakyan. Mibalos usab pagkaway kaniya ang madre nga nagbarog sa tungod sa gate nga puthaw. Wala gayod mobiya ang madre sa gate samtang makita pa niini ang gisakyan nila ni Rey.

Samtang nagdagan ang sakyanan, si Rey nagtaghoy-taghoy. Malipayon kaayo siya nga sa dili madugay mogawas na si Veronica, aw, sister Veronica, sa kombento. Matuman na gayod ang iyang pangandoy alang kanilang duha.

Si Corporal Benturada mopanagsang pasiklap kang Rey samtang nagmaneho kini sa sakyanan. Nakapahiyom usab si Benturada nga  miduyog sa kamalipayon ni Rey. -- Sumpayan pa