Alcoholic

Unsaon nako pagkasayod, Doc, nga alcoholic na ko?” ni Albert ngadto’s iyang family doctor nga si Dr. Mario Fernan. Nia karong sayong kahaponon si Albert sulod sa klinika sa mananambal.

“Sa di pa na nako tubagon imong pangutana, mangutana una ko’g seguro,” sa doctor nga nagkuha sa estetoskop sa iyang liog dungan sa iyang paglingkod sa atubangan sa iyang lamesa ug sa pagbutang sa himan sa doctor ibabaw sa lamesa.

Bag-o lang niabot ang doctor gikang nibisita og pasyente sa ospital. Naglingkod na daan si Albert sa lingkuranan dikit sa walang tumoy sa lamesa.

“Unsa may imong pangutana, Doc?” ni Albert. “Kun masayod ka nga alcoholic ka, mokomiter ba ka nga mosalmot sa Alcoholics Anonymous?’ sa doctor. Dugay’ng nakatingog si Albert. Nibutho ang gagmay’ng lusok sa singot sa agtang. Bisa’g air conditioned ang klinika.

“Kay kun di ka mokomiter, way importansiya nga masayod ka” sa doctor. Dugay nang nasayod ang doctor. Kay sa hitsura lang daan ni Albert, makita na nga alcoholic kini. Apan dili man gyud angay’ng mohangad ang doctor. Kinahanglang pangunsultahon gyud siya’s pasyente una siya mohatag og dayagnos.

“Sige, dok. Mokomiter ko,” ni Albert.

“Good. Tagaan tika’g questionnaire. Upat lang ka pangutana naa sa papel. Sa luyo ining papel mabasa nimo ang ngalan ug address sa tawo nga imong duolon aron matabangan ka sa Alcoholics Anonymous,” sa doctor.

“Nibira og hunos sa walang tumoy sa lamesa. May papel gikuha. Gitunol ngadtong Albert.

Gidawat ni Albert ang papel. Gibasa. Nasabtan niya ang upat nga pangutana. Mao ni ang nabasa niya.

“Usa ka na ka alcoholic kon “yes” o “o” ang tubag nimo ning upat ka mga pangutana: 1. Duna bay higayon nga nisulay ka pagpaminus sa imong inimnan? 2. May higayon bang napikal ka nga dunay nihisgut sa imong pag-inom? 3. Nakasuway ka ba’g inom sa buntag? 4. Nibati ka ba’g “guilt feeling” (kahigwaos) mahitungod sa imong pagkapalainom?”

Gipilo ni Albert ang papel. Nikurog og gamay iyang mga kamot. Nitindog siya. Nipasalamat sa doctor. Ug hinay nga nilakang pagawas sa klinika.

“Pahibaw-a lang unya ko kun tua ka na didto. Kay mobisita ko nimo,” ni Dr. Fernan. Niyango lang si Albert. Di ganahang motingog. Nibutokbutok iyang dughan. (Katapusan)