Sayidlayin sa pananggot
Nakiha og mga kasong pagpakauwaw si Marco tungod sa iyang kahimantayon ug kalibakero. Hinoon, mangayo ra man siya’g pasaylo inig taralon na siya sa barangay hall. Dili lang kalima ka higayon siya nakiha sa barangay. Dili na lang sab mopadayon og pasaka og kaso ang biktima kay di man lalim ang gastohan sa kaso. Unya nangayo na man og pasaylo ang gikiha sa barangay. Karon, niatubang na sab si Marco sa nikiha niya kay gihimoa’g ngil-ad nga istoryang gipakatap sa tibook barangay.
Pananggot ra man god ang trabaho ni Marco. Sayong buntag ug sayong hapon lang ang trabaho. Unya sa tibook adlaw, sigi’g estambay sa tindahan ni Lilang sa baryo Nipilay. Apan dili lang siya sa tindahan mamanatay. Kun tua siya’s tumoy sa lubi, daghan sab siyang makitang ikasaway sa mga silingan.
Estoryador gyud hinoon si Marco. Unya daghan na man ganing dili motagad o maminaw sa iyang istorya. Apan sa mga tawong sakitan sa iyang mga pamantay, libak ug saway, mapugos gyud og kiha niya sa barangay. Ulitawo pa ni si Marco. Apan medyo may pagka bading kay wa man gyuy nakamatikod nga nag-ibid-ibid ni siya’g dalaga.
Kay hasulan sab si Tristan, sekretaryo sa barangay kapitan nga kanunay magmakinilya og summons o notice kun dunay kiha ni Marco sa barangay, nakahunahuna og paagi si Tristan.
“Pabilin sa kadiyot Marc kay duna koy isugyot nimo†ni Tristan ngadtong Marco nga nagpaulahi og kanaug sa barangay hall.
“Ngano man Tan†ni Marco.
“Naa koy isulti nimo. Unya na’g kita na lang duha mahibilin†ni Tristan nga nagpasiklap sa mga tawong nanganaug sa hagdan sa barangay hall.
Dangtag usa ka tuig, wa na gyud mataral si Marco sa barangay hall. Ug wa na sab siya mag-estambayan sa tindahan. Sigi gihapon siya’g pananggot. Apan duna na siya’y gikalingawan nga nakapahurot sa iyang oras. Ug kada tapos bulan, magkita silang Tristan bisa’g way kaso sa barangay.
“Unsa na man Marc? Makaingon ka ba nga nasayop ko sa akong tambag nimo?†ni Tristan. Nagpahiyom.
“Wa gyud ka masayop Tan,†ni Marco. Mapahiyomon sab. Nag-apir ang managhigala.
“Giingnan tika nga duna kay creative talent. Angay lang nimong ipasubay sa insaktong agianan†ni Tristan. “Bilib gyud ko nimo, Tan†ni Marco. Nanaug siya sa barangay hall nga nag-ihap sa iyang bahin sa honorarium sa mga sugilanong iyang namantala sa Banat News.
“Kun duna kay tawong libakon, himoi’g sugilanon. Usba lang ang ngan, trabaho ug address. Ayaw ipanulti. Ako ang momakinilya sa sugilanon. Unya tunga tas imong talent feeâ€. Wa gyud kalimti ni Marco ang sugyot sa higala. Nisamot ilang kasuod kay susyo na man gyud sila. Nakakita pa siya’g sayidlayin sa pananggot. (Kataposan)
- Latest
