Dear Tita Salie,
Good day. Tagoa lang ko sa ngalan nga Sharkrider, ulitawo nga ania nagpuyo sa Mandaue City. Kining akong problema nagsugod kini dihang akong nakit-an ang usa ka tindera sa usa ka tindahan diri lang duol sa among pinuy-anan.
Sa una pa lang nakong pagkakita niya ingon sa naibog ug gibati ko ang paghigugma kaniya. Mao nga nagsige na ko og paduol niya, Tita Salie, bisan pa man kun ang akong mga higala moingon nga lago siya ug mora’g walay kaligo.
Wala nako tagda ang ilang estorya lagi kay ganahan ko niya. Hangtod nausab siya ug mora’g mauwaw na hinuon siya kanako.
Karon wala na siya diri kay mipauli na sa ilaha. Mora hinuon og haw-ang na ang akong kinabuhi. Unsay akong buhaton? Please help, Tita Salie. Thank you.
* * *
Good day. Kun mipauli na siya sa ilaha ug wala gyod kay nakuha nga information bahin kaniya sama sa lugar nga iyang gipuy-an, cell number, o facebook account o kaha bisan ang iyang ngalan wala gyod kay mahimo gawas sa paghunahuna na lang kaniya.
Apan kun imo siyang napangayoan sa iyang pangalan o kaha iyang selpon number, puwes, puyde kaayo nimo siyang teksan o kaha tawagan. Puyde usab nimo siyang i-search sa facebook aron mamahimo nimo siyang higala ug imong mapadayon ang inyong maayo ang relasyon. -- Tita Salie