Swerte sa basura

Gula 2

Nagpahiyom si Chona nga mibiya sa gitrabahoan ni Roger. Sa wala pa kini molakaw, nagbilin kini og matam-is nga pahiyom sa ulitawo. Gikalipay na lang ‘sab ni Roger nga nakatabang siya ni Chona.

Gisundan paglantaw ni Roger si Chona hangtod nga misakay kini og PUJ paingon sa Lahug. Mikuha si Roger og kopya sa Banat News ug iyang nasayran nga ang amahan ni Chona usa diay sa 182 ka drayber nga giisyuhan og citation ticket.

Naghingusog g’yud diay ang mga sakop sa CESET sa pagpang-isyu og citation tickets sa mga drayber og trak sa basura nga mohakot og basura nga wala mabahig ang malata ug ang dili malata.

Alang ni Roger, tukma lang ‘sab nga isyuhan og citation ticket aron pamultahon ang amahan ni Chona kay nakalapas man kini sa ordinansa sa dakbayan. Paspas ang pagtuyok sa orasan, ug miabot ang kahaponon.

Tali-pauli na si Roger ug giandam na gani niya ang iyang kagamitan. Mitingog ang intercom sa iyang lamesa. Gitubag ni Roger ug nasayran nga gikan diay sa gwardya ang tawag.

“Sir dia kadtong babaye nga gikaestorya nimo ganinang buntag, mibalik uban ang iyang Papa kay magpasalamat g’yud sila nimo,” matud sa guard.

Gipahuwat kadiyot ni Roger si Chona ug ang iyang amahan. Wala danti og dies minutos, migawas na si Roger sa opisina. Mitindog dayon si Chona pagkakita kang Roger. “Sir mao kini si Papa nga gidakop sa mga sakop sa CESET,” paila-ila ni Chona.

Mipahiyom ang amahan ni Chona ug mipasalamat kang Roger. “Salamat kaayo sa imong pagtabang sir. Wala pa man gud ko madakpi sukad-masukad mao nga nasubo kaayo ko nga gidakop na lang hinoon sa pagkarga og unsegregated nga basura,” matud sa papa ni Chona.

Napanid-an ni Roger nga milutaw na ang kaanyag ni Chona. Nag-ilis na kini og arang-arang nga sinena dili sama kaganinang buntag. “Nagtagad pa g’yud kamo pagpasalamat. Oki na alang nako nga nakatabang ug dili na kinahanglan pa nga pasalamatan,” ni Roger.

Giimbitar ni Roger ang amahan ug anak nga mangaon sila sa usa ka kan-anan sa unahan. “Kamo na lang si Chona sir kay mo-duty na ko sa DPS basin og ma-late ko sir,” mapaubsanon nga balibad sa amahan.

Gisabot ra usab ni Roger ang amahan ni Chona. “Buyno, kita na lang ang mangaon Chon kay nagdali man ang imong papa,” matud ni Roger nga mitutok sa dalaga. Ingon sa nagpanuko si Chona pagtangdo ug masabot kaayo nga nauwaw.

“Ayaw kauwaw nako Chon, isipa nga suod ug dugay na kita nga managhigala,” giingnan ni Roger si Chona. - Sumpayan