Pinanggang iro ni Rosa

Dad-on nato ni si Elvis sa beterinaryo kay nagluya man ni siya ug way gana mukaon,” agni pa ni Rosa ngadto sa iyang bana nga si Miyo. “Tsoookoy..., nganong nagluya man ka uy nga perti man nimong kiata,” sulti pa ni Miyo samtang gikugos ang ilang unom ka buwang itoy nga kolor puti, balhibuon ug cute kaayo kay mubo man.

Hinatag ang iro nga Shi ‘ Tzu nga kaliwat sa ilang ugangan sa Mandaue. Pinangga kaayo si Elvis kay inatiman pag-ayo ang pagkaon niini kay dili kini pareha sa askal nga iro. Kinaligo pud kini matag semana ug kung dili man ila kining ipa ‘hair spa’ sa Dog clinic. Sa panahon sa kagabhion, idulog kini ni Rosa kay siya ra mang usa kay si Miyo mo-duty man sa call center.

“Tana Miyo mag-taxi na lang ta, adto nato ni ipa check-up sa Mabolo naa may dog clinic ngadto.”

“Maypa kay duol-duol ra diri sa atoa,” tubag pa ni Miyo sa iyang asawa.

Gi-check up dayon si Elvis sa beterinaryo.

“Uy, gihilantan man siya og giubo pa gyud,” pulong pa sa doktor.

“Mao ba dok?, nganong naglaway-laway man siya ganinang buntag ug nagluya pa gyud?” nangutana si Rosa.

“May posibilidad nga basin nakakaon ni siya’g pagkaon nga adunay vetsin,” tubag pa sa beterinaryo.

“Nakabuhi man gud na siya gahapon ug nakita nako nga gihagwa-hagwa sa among silingan kay paraygon man gud nang iroa bisan kinsa moduol na siya,” tug-an pa ni Miyo.

“Hhmmmm, mao ba... wa pud ka kahibalo og gitagaan ni siya’g pagkaon nga gidili, maayo unta to’g na-immunize ni kay may proteksiyon, lig-on ug may ikasugakod iyang lawas batok sa sakit,” dugang pa sa beterinaryo.

Nagkipat-kipat ang mata ni Rosa nga nagsud-ong sa iyang iro nga mora’g tawo nga gi-stethoscope ug pagkahuman gi-check-up pud ang baba sa beterinaryo.

“Base sa iyang laboratory results, ubay-ubay nga vetsin iyang nakaon ug complicated kay wa man siya’y immunize ... palita na lang kining mga resitaha ipatumar, itingal, pugsa pagpainom hangtod sa baynte-uno diyas,” sugo pa sa beterinaryo nga nagtunol sa resita.

Moduha na lang ka semana nga sige’g patomar si Rosa sa kang Elvis ug gani iya man kining gitingalan pud og cerelac kay di na man ganahan mokaon og kan-on. Migrabe ang sakit sa iro kay maglubog na man. Pero sa higayon nga tawgon kini ni Miyo, mopugos kini sa pagbangon aron mohangop sa iyang amo nga gikan pa sa trabaho.

“Elvis, Elviiis....”, sangpit pa ni Rosa samtang gasud-ong sa hayop nga nagbarag-barag sa paglakaw ug wa makaagwanta nalup-og ug wala na makabangon. Iya na lang kining gikugos ug gihapuhap-hapuhap ang mga balhibo.

Pag-abot sa kabuntagon, midali-dali og naog si Rosa kay iya na pud nga pakan-on ug paimnon og tambal ang pinangga niyang iro nga si Elvis. Apan, pagnaog niya sa hagdan mao na lamang iyang nakita nga si Miyo nagsud-ong sa iro nga wa na maglihok! Nakulbaan si Rosa.

“Hoy Miyo!, nganong naghinuktok ka man nga nag-atubang ni Elvis? Miduol og maayo si Rosa sa iro.

“Wala na siya day, ni-surrender na gyod siya sa iyang sakit,” magul-anong tubag ni  Miyo sa iyang asawa.

Midagayday ang mga luha sa aping ni Rosa nga wa na niya mapugngi ug nabuhian na lamang niya ang tambal nga iyang gikuptan niadtong tungora aron unta ipainom na usab sa iyang pinalangga kaayo nga hayop.

“Huhuhuhu... mibiya ka na man diay Elvis, dili na kami makakita og iro nga sama nimo ka bootan, huhuhuhu.” (Katapusan)