Isla Paraiso - Gula 104

Sa nadungog ni Rey, ingon sa diha’y kapid-an ka mga pako nga mikapakapa sulod sa iyang dughan. Daw dili masukod ang kalipay nga iyang gibati niadtong higayona. Dili mahubit sa pulong ang kahinangop nga migahom sa iyang kaugalingon. Tiaw bay sulod sa taas nga kutay sa panahon, naangkon na gayod niya ang tam-is kaayong “Oo” sa babaye nga iyang gimahal.

Karon pa makaamgo si Rey. Hilabihan gayod diay katam-is ang kadaugan nga gipuhonanan og mga pag-antos. Iya kining nasinati karon. Alang kaniya, siya na ang labing malipayong binuhat sa kalibotan.

“Apan ayaw kalimot sa kondisyon, Rey,” matud ni sister Veronica nga mipahinumdom sa bag-o niyang hinigugma.

“Ayaw kabalaka, sister Veronica,” ni Rey pa. “Tamdan ko kanunay ang kondisyon nga imong gihatag kanako. Dili ako molapas sa atong gikasabotan.”

“Salamat kun mao kana,” nahimuot si sister Veronica. “Ug hinaut usab nga dili mo abusohan ang pagsalig ko kanimo.”

“Makalaom ka, V-Veronica...”

“Upsss!” Mibadlong si sister Veronica. “Palihog, Rey, ayaw usba ang pagsangpit mo kanako. Ayaw kalimot nga usa pa gihapon ako ka madre. Gidawat ko man ang imong gugma apan wala mo pa ako mapanag-iya sa hingpit. Busa, tahora ang akong bokasyon. Please...sangpita gihapon ako og sister Veronica. Okey?”

“K-kun maoy imong gusto,” ni Rey nga nagkahinay ang tingog, “i-ikaw ang mag-igo, s-sister Veronica.” -- Sumpayan pa